ەلىمىزدە سول اياعى وڭ اياعىنان 7 سانتيمەتر قىسقا ناۋقاسقا وتا جاسالدى

 الماتىداعى №4-قالالىق اۋرۋحانانىڭ تراۆماتولوگ-ورتوپەدتەرى ناۋقاسقا تۋا بىتكەن ورتان جىلىكتىڭ شىعۋى مەن جامباس بۋىنىنىڭ ءتورتىنشى دارەجەلى ديسپلازياسىن تۇزەتۋ ءۇشىن بىرەگەي ءارى كۇردەلى وپەراتسيا جاسادى، دەپ حابارلايدى Kazinform. 

تاراز قالاسىنداعى كلينيكالارىنىڭ بىرىندە مەيىرگەر بولىپ ىستەيتىن 27 جاستاعى جىگىتتىڭ تۋا ءبىتتى كەمىستىگى بار. سول اياعى وڭ اياعىنان 7 س م-گە قىسقا. بۇل بۇكىل تىرەك-قيمىل جۇيەسىنە اۋىر جۇكتەمە.

الماتىداعى №4-قالالىق اۋرۋحاناسىنا مەديتسينالىق تەكسەرۋدەن وتۋگە كەلگەن ناۋقاسقا دارىگەرلەر وپەراتسيا جاساتۋعا كەڭەس بەردى.

«ناۋقاس بىزگە كونسۋلتاتسياعا كەلگەندە، وعان وپەراتسيا جاساۋدى ۇسىندىق. سول اياققا وتا جاسادىق، ەندى بىرەر ايدان كەيىن ەكىنشى جامباس بۋىنىنا وتا جاسايمىز. سودان كەيىن ناۋقاس ءجۇرىپ، اقساقتىقتان قۇتىلادى»، - دەيدى №4-قالالىق كلينيكالىق اۋرۋحانانىڭ ەندوپروتەزدەۋ ءبولىمىنىڭ مەڭگەرۋشىسى ماناربەك اۋباكىروۆ.

وپەراتسياعا رەسەيدەن كەلگەن گ. ا. يليزاروۆ اتىنداعى ۇلتتىق مەديتسينالىق تراۆماتولوگيا جانە ورتوپەديا ورتالىعىنىڭ دارىگەرى اندرەي كامينسكي قاتىستى. قازاقستاندىق جانە رەسەيلىك دارىگەرلەردىڭ بىرلەسكەن وپەراتسياسى 4 ساعاتقا سوزىلدى.

«الماتىلىق حيرۋرگتارىمەن بىرگە ءبىر وپەراتسياعا قاتىستىم. وپەراتسيا شىنىمەن دە وتە كۇردەلى بولدى جانە مۇنداي وپەراتسيانى تاڭداۋ ءۇشىن دارىگەرلەردىڭ سايكەس كاسىبيلىگى، ءبىلىمى مەن تاجىريبەسى قاجەت. ەندوپروتەز ءمىنسىز ورناتىلدى»، - دەپ اتاپ ءوتتى اندرەي كامينسكي.