ەلىمىزدە ستالكينگ ءۇشىن قىلمىستىق جاۋاپكەرشىلىك ەنگىزىلەدى

فوتو: Фото: freepik

استانا. KAZINFORM - ەلىمىزدە ستالكينگ ءۇشىن قىلمىستىق جاۋاپكەرشىلىك ەنگىزىلەدى. بۇل تۋرالى ادىلەت مينيسترلىگى قوعامدىق ءتارتىپ سالاسىنداعى زاڭناما دەپارتامەنتىنىڭ ديرەكتورى دۋمان سۇلەيمەنوۆ ءمالىم ەتتى.

- ستالكينگ - ادامنىڭ زاڭسىز قۋدالانۋى، ول قوعامعا ەلەۋلى قاۋىپ توندىرەدى. بۇل ارەكەت جابىرلەنۋشىگە پسيحولوگيالىق تۇرعىدان كەرى اسەر ەتەدى، ياعني ۇرەي، قورقىنىش، الاڭداۋشىلىق تۋدىرادى. ستالكينگ كەزىندە كوبىنە قورقىتۋ، ار-نامىسقا تيۋ، قورلاۋ سياقتى ارەكەتتەر بايقالادى. سوندىقتان بۇل ارەكەتتەر ءۇشىن قىلمىستىق كودەكستە بولەك باپپەن جاۋاپقا تارتۋ تالاپ ەتىلىپ وتىر، - دەدى دۋمان سۇلەيمەنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، قىلمىستىق كودەكسكە ستالكينگكە قارسى ارنايى باپ بولماعاندىقتان، ونىڭ قۇرباندارى كوبەيۋى مۇمكىن.

- ستالكينگكە ۇشىراۋدىڭ ارتى فيزيكالىق زورلىق-زومبىلىققا، قورلىق كورسەتۋگە، مۇلىككە زاقىم كەلتىرۋ قاۋپىنە اكەلۋى مۇمكىن. سوندىقتان وتباسىلىق تۇرعىدا دا ستالكينگكە جاۋاپكەرشىلىك ەنگىزۋ جابىرلەنۋشىلەردى قورعاۋعا مۇمكىندىك بەرەدى، - دەيدى ادىلەت مينيسترلىگىنىڭ وكىلى.

ايتا كەتەيىك، بيىل 26-ماۋسىمدا سەنات «قازاقستاننىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ماقۇلدادى.

وسى ورايدا قىلمىستىق كودەكسكە ستالكينگ، ياعني ادامدى ونىڭ ەركىنە قايشى كەلەتىن، زورلىق-زومبىلىقپەن ۇشتاسپايتىن، ەلەۋلى زيان كەلتىرۋگە اكەپ سوققان بايلانىس ورناتۋعا جانە ونىڭ ىزىنە تۇسۋگە باعىتتالعان ءىس-ارەكەتتەردە كورىنىس تاباتىن، ادامدى زاڭسىز قۋدالاعانى ءۇشىن قىلمىستىق جاۋاپتىلىقتى كوزدەيتىن جاڭا 115-1-باپ ەنگىزىلدى.