ەلىمىزدە سالىق بەرەشەگىن ءوندىرىپ الۋ ءتارتىبى قايتا قارالادى

استانا. KAZINFORM - مەملەكەتتىك كىرىس كوميتەتى اۋديت دەپارتامەنتىنىڭ باسقارما باسشىسى قايسار ارىن قاي جاعدايدا سالىق ورگاندارى بورىشكەرلەردىڭ مۇلكىنە ءوندىرىپ الۋ شاراسىن قولداناتىنىن ءتۇسىندىردى.

باستاپقىدا سالىق تولەۋشىگە بەرەشەگىن ءوز بەتىنشە وتەۋگە مۇمكىندىك بەرىلەدى. وسىدان كەيىن سالىق تولەۋشى تولەمدى وتەمەسە، ماجبۇرلەپ ءوندىرىپ الۋ ءىس-قيمىلدارى جاسالادى.

- زاڭدى تۇلعالار، جەكە كاسىپكەرلەر سالىقتى ۋاقىتىندا تولەمەگەندە، سالىق كودەكسى اياسىندا حابارلاما جولدانادى. بۇل رەتتە تاۋەكەل دارەجەسى بار. ياعني جوعارى دارەجەلى تاۋەكەل بولسا، حابارلاما جىبەرىلگەننەن كەيىن، ءبىر جۇمىس كۇنى ىشىندە ءبىز مۇلكىنە شەكتەۋ ءىس-قيىلدارىن اتقارۋىمىز كەرەك. ال ورتا دارەجەلى تاۋەكەل ايماعىندا بولسا، وندا 15 جۇمىس كۇنىندە مۇلكىن شەكتەۋ جۇمىستارىن جۇزەگە اسىرامىز. وسى ءتارتىپ سالىق كودەكسىنىڭ 120-بابىندا كورسەتىلگەن.

مۇلكىن شەكتەۋ دەگەنىمىز نە؟ سالىق تولەۋشىنىڭ تىركەۋگە قويىلعان مۇلكىنە بايلانىستى جانە بۋحگاتەرلىك تەڭگەرىمىندە تۇرعان مۇلىكىنە شەكتەۋ قويامىز. سونىمەن قاتار، ءوندىرىپ الۋ ءىس-قيمىلدارىن اتقارامىز، - دەدى كوميتەت وكىلى ەلوردادا وتكەن بريفينگىدە.

مۇنىمەن قوسا ق. ارىن قازىر پارلامەنت ماجىلىسىندە قارالىپ جاتقان جاڭا سالىق كودەكسىندە وزگەشە تەتىكتەر پىسىقتالىپ جاتقانىن اتاپ ءوتتى. جاڭا سالىق كودەكسىندە سارالانعان ءتاسىل قاراستىرىلعان. قازىر 180 مىڭعا جۋىق بورىشكەر بولسا، ونىڭ 60 پايىزىنىڭ 20 ا ە ك- كە دەيىن (78640 تەڭگە) قارىزى بار.

ونىڭ ايتۋىنشا، جاڭا كودەكس جوباسىنا ۆەدومستۆو ءتيىستى ۇسىنىس جاساعان. ەگەر سالىق تولەۋشىنىڭ ايىپپۇلدى، ءوسىمپۇلدى جانە نەگىزگى سالىقتى قوسقانداعى جالپى سوماسى 20 ا ە ك- كە دەيىن (78640 تەڭگە) قارىزى بولسا، وندا سالىق ورگانى ەسكەرتۋ جىبەرۋمەن شەكتەلەدى. باسقا ەشقانداي جازا قولدانىلمايدى.

- بۇدان بولەك، 20 دان 45 ا ە ك- كە دەيىنگى (78640-176940 تەڭگە) قارىزدار بويىنشا بانك شوتتارىنىڭ شىعىس وپەراتسيالارى مەن كاسسا بويىنشا شىعىس وپەراتسيالاردى توقتاتا تۇرۋ وكىمى شىعارىلىپ، وندا سالىق بەرەشەگىن وتەۋ مەرزىمىن كورسەتە وتىرىپ، حابارلاما جىبەرۋمەن شەكتەلەمىز، - دەدى ق. ارىن.

ونىڭ سوزىنە قاراعاندا، اتالعان قادامدار قارىزدى ءوندىرىپ الۋعا اكەلمەسە، وندا 45 ا ە ك- تەن (176940 تەڭگە) جوعارى بەرەشەك كەزىندە ءوسىمپۇلدى تولىق ەسەپتەۋ، بانك شوتتارى مەن كاسسالار بويىنشا شىعىس وپەراتسيالارىن بۇعاتتاۋ، ينكاسسالىق وكىم شىعارۋ، مۇلىكتى تۇگەندەۋ جانە باسقا دا ءىس-شارالار اتقارىلادى.

بۇعان دەيىن مەملەكەت الدىندا قارىزى بار كومپانيالاردىڭ كوبىنە ءىس قوزعالعانىن جازعان ەدىك.