ەلىمىزدە قاسىم-جومارت ەسىمدى 12 ادام، ءبىر پۋتين، سەگىز بايدەن بار

استانا. KAZINFORM - بيىل جىل باسىندا قازاقستان حالقىنىڭ سانى 20 ميلليون بولدى، بۇل ءبىر جىل بۇرىنعىدان 1,3 پايىزعا ارتىق. حالىق سانى بىرتە-بىرتە ءوسىپ جاتىر. جىل سايىن شامامەن 1,3-1,5 پايىز ءوسىم بار. تەك 2022 -جىلى - كارانتيننەن كەيىنگى بەبيبۋم جىلى

ءوسىم 3,3 پايىز بولعان ەدى.

Ranking.kz مالىمەتىنشە، قازاقستاندىقتاردىڭ باسىم كوبى ءداستۇرلى تۇردە ەلىمىزدىڭ وڭتۇستىك ايماقتارىندا - الماتى (2,2 ميلليون ادام، پليۋس جىلىنا 3,1 پايىز)، تۇركىستان (2,1 ميلليون ادام، پليۋس 1,1 پايىز) جانە الماتى (1,5 ميلليون ادام، پليۋس 1,7 پايىز) وبلىستارىندا تۇرادى.

ەلوردادا 1,4 ميلليون ادام بار.

حالىق از تۇراتىن ءوڭىر - ۇلىتاۋ وبلىسى: 221,6 مىڭ ادام - ءبىر جىل بۇرىنعىدان 0,1 پايىزعا ارتىق. ودان كەيىن سولتۇستىك قازاقستان (530,1 مىڭ ادام) جانە اباي (607,6 مىڭ ادام) وبلىستارى تۇر.

12,5 ميلليون ادام - قالادا (جىلىنا پليۋس 2 پايىز)، اۋىلدا - 7,6 ميلليون ادام (پليۋس 0,3 پايىز) تۇرادى.

29-اقپانداعى مالىمەت بويىنشا ەلىمىزدە قازاقستان ەسىمدى 24 ادام تىركەلگەن.

ونىڭ ەڭ كوبى اقمولا وبلىسىندا تۇرادى: 7 ادام.

استانادا مۇنداي ەسىمدى تاعى 5 ادام، قاراعاندى ​​وبلىسىندا 4 ادام بار.

سونىمەن قاتار، قازاقستان ەسىمدى 3 ادام - قوستاناي وبلىسىندا، 2 ادام - ماڭعىستاۋ وبلىسىندا، 2 ادام - شىمكەنت قالاسىندا، 1 ادام - باتىس قازاقستان وبلىسىندا تۇرادى.

قازاقستاندىقتاردىڭ ىشىندە 24 استانا، 20 الماتى جانە 3 شىمكەنت بار.

سونىمەن قاتار، قازاقستاندا سەمەي اتتى 27 ادام، اتىراۋ ەسىمدى 15 ادام، 15 تۇركىستان، 14 تاراز، 10 اقتاۋ، ءبىر اقتوبە، ءبىر تالدىقورعان بار.

ساياسي قايراتكەرلەردىڭ اتىن قويۋ دا داستۇرگە اينالعان. ەلىمىزدە 12 قاسىم-جومارت، 1 پۋتين، 1 ترامپ جانە 8 بايدەن تۇرادى.

بيىلعى جىلدىڭ قاڭتار ايىندا قازاقستاندا ءجيى قويىلاتىن ەڭ تانىمال ەسىمدەر مەدينا مەن ءاليحان بولدى.

ەلىمىزدە 517 مەدينا، 313 ءاليحان بار.

قىزداردىڭ ەسىمى بويىنشا ۇزدىك بەستىككە اسىلىم (468 ادام)، ايشا (436 ادام)، ايلين (387 ادام) جانە توميريس (318 ادام) كىردى.

ۇل ەسىمدەرىنىڭ ىشىندە ەڭ تانىمال بەستىككە مۇحاممەد (305 ادام)، ايسۇلتان (238 ادام)، مۇحامماد (231 ادام) جانە الديار (219 ادام) كىردى.