ەلىمىزدە مۇناي ءوندىرىلىپ جاتقان 289 كەن ورنىندا 4,38 ميلليارد توننا قور بار

اتىراۋ. KAZINFORM - قازاقستاننىڭ ءار وڭىرىندە مۇناي ءوندىرىلىپ جاتقان 289 كەن ورنى بار. بۇل كەن ورىندارىنان الىناتىن مۇنايدىڭ قورى 4,38 ميلليارد تونناعا باعالانىپ وتىر.

ENERGY MONITOR تەلەگرام ارناسىنىڭ مالىمەتىنە سۇيەنسەك، مۇناي قورىنىڭ باسىم بولىگى باتىس وڭىرلەردەگى كەن ورىندارىنىڭ قويناۋىندا جاتىر.

بيىل قازاق مۇنايىنىڭ العاشقى تامشىسى الىنعانىنا 125 جىل تولادى. الەمدىك نارىقتا باررەلمەن باعالاناتىن العاشقى مۇناي 1899-جىلى اتىراۋ وبلىسىندا وندىرىلگەن.

قازىر بۇل وڭىردەگى «تەڭىز»، «قاشاعان» سەكىلدى ءىرى كەن ورىندارى شەتەل ينۆەستورلارىمەن بىرگە يگەرىلىپ جاتىر. اتىراۋ وبلىسىنداعى وسىنداي جانە وزگە دە كەن ورىندارىنان وندىرىلەتىن 3,2 ميلليارد توننا «قارا التىن» بار. بۇل ەلىمىزدە ءوندىرىلۋى ءتيىس مۇناي قورىنىڭ 73 پايىزىن قۇرايدى.

بۇدان كەيىنگى كومىرسۋتەكتى شيكىزاتتىڭ مول قورى مۇنايلى تۇبەك اتانعان ماڭعىستاۋ وبلىسىنداعى كەن ورىندارىندا بارلانعان. مۇنداعى مۇنايدىڭ قورى - 0,56 ميلليارد توننا. ال، اقتوبە وبلىسىندا 0,36 ميلليارد، قىزىلوردا وبلىسىندا 0,12 ميلليارد توننا «قارا التىن» بار دەپ ەسەپتەلەدى.

باتىس قازاقستان وبلىسىنداعى كەن ورىندارىنان الىناتىن «قارا التىننىڭ» قورى 0,09 ميلليارد توننانى قۇراپ وتىر. ەلىمىزدىڭ وزگە وڭىرلەرىندەگى تابيعي بايلىقتىڭ ۇلەسى — 0,05 ميلليارد توننا.

ەسكە سالا كەتەلىك، بۇعان دەيىن «باكۋ-تبليسي-دجەيحان» قۇبىرىمەن مۇناي ەكسپورتى 1 ميلليون 392 مىڭ تونناعا ۇلعايعانىن حابارلاعان بولاتىنبىز.