ەلىمىزدە مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ينستيتۋتى ەنگىزىلىپ جاتىر

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىنىڭ قورىتىندىسى بويىنشا وتكەن باسپا ءسوز ءماسليحاتىندا مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋعا قاتىستى زاڭنامانىڭ نەگىزگى ءمانىن ءتۇسىندىردى.

ءوز كەزەگىندە جۋرناليستەر ا. ءالنازاروۆاعا «جاقىندا دارىگەرلەردىڭ كاسىبي قاتەلىكتەرى ءۇشىن جاۋاپكەرشىلىككە قاتىستى زاڭ قابىلدانىپ، كۇشىنە ەندى. ەندى پاتسيەنتتەردىڭ دەنساۋلىعىنا زيان كەلتىرگەن كەزدە دارىگەرلەر ايىپپۇل تولەيتىن بولادى. بۇل قانداي سوما جانە ول ءىس جۇزىندە قالاي جۇزەگە اسىرىلادى؟» دەگەن ساۋال قويدى.

مينيستر بۇعان دەيىن زاڭنامادا مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ءۇشىن ەشقانداي قۇرال كوزدەلمەگەنىنە توقتالدى.

«دەنساۋلىققا زيان كەلتىرگەن نەمەسە دەنساۋلىعىن ناشارلاتقان، ناۋقاستىڭ مۇگەدەكتىگىنە نەمەسە ولىمىنە اكەپ سوقتىرعان دالەلدەنگەن مەديتسينالىق قاتەلىك جاعدايلارى بۇرىن قىلمىستىق تارتىپپەن قارالعان. مۇنداي جاعدايلاردا مەديتسينا قىزمەتكەرى ماتەريالدىق جانە مورالدىق زالالدى ءوزى تولەدى. مەملەكەت باسشىسىنىڭ تاپسىرماسى بويىنشا قازاقستاندا العاش رەت مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ينستيتۋتى ەنگىزىلدى، ول وسى وقيعالاردى مەديتسينالىق ۇيىمدار دەڭگەيىندە قاراۋعا مۇمكىندىك بەرەدى. ءۇش دەڭگەيلى جۇيە ەنگىزىلۋدە: مەديتسينالىق ۇيىم، دەنساۋلىق ساقتاۋ باسقارماسى جانە مەديتسينالىق جانە فارماتسيەۆتيكالىق باقىلاۋ كوميتەتى دەڭگەيىندە. ەگەر دەنساۋلىققا كەلتىرىلگەن زيان انىقتالسا جانە پاتسيەنت پەن ونىڭ تۋىستارى وتەمدى قابىلداۋعا دايىن بولسا، وندا زالال ساقتاندىرۋ پۋلى ەسەبىنەن وتەلەدى. مەديتسينالىق قىزمەتكەردىڭ وزىنە قارجىلىق جۇكتەمە كوزدەلمەيدى، ونىڭ بارلىعى جىل سايىن بارلىق جۇمىس بەرۋشى مەديتسينالىق قىزمەتكەرلەر ءۇشىن مىندەتتى تۇردە تولەيتىن ساقتاندىرۋ جارنالارى ارقىلى تولەنەدى»، - دەپ اتاپ ءوتتى اقمارال ءالنازاروۆا.

ايتا كەتەيىك، جاقىندا قازاقستاندا مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋدى ەنگىزەتىن «ق ر كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ نورمالارى كۇشىنە ەندى.

اۆتور

ابىلايحان جۇماشيەۆ