ەلىمىزدە كرەديت بيۋروسىنا قويىلاتىن تالاپتار كۇشەيدى

استانا. KAZINFORM - قارجى نارىعىن رەتتەۋ جانە دامىتۋ اگەنتتىگى 16-تامىزداعى قاۋلىسىمەن كرەديت بيۋروسىنا قويىلاتىن تالاپتار كۇشەيدى.

وسى قاۋلى ارقىلى قاشىقتان قىزمەت كورسەتۋ ءۇشىن باعدارلامالىق قامتىلىمنىڭ قاۋىپسىزدىگى بويىنشا كرەديتتىك بيۋرولارعا قويىلاتىن قوسىمشا تالاپتار بەلگىلەندى.

تالاپتارعا سايكەس كرەديتتىك بيۋرولار باعدارلامالىق قامتىلىمدى پايدالانۋعا بەرگەنگە دەيىن ونىڭ باستاپقى كودىنىڭ قاۋىپسىزدىگىنە تالداۋ جاسايدى جانە انىقتالعان كەمشىلىكتەردى جويادى.

قاۋلىدا كرەديتتىك بيۋرولاردىڭ ۆەب-قوسىمشالارى مەن موبيلدىك قوسىمشالارىن ازىرلەۋدىڭ دە، ولاردى پايدالانۋدىڭ دا قاۋىپسىزدىگىن قامتاماسىز ەتۋ ءتارتىبى قوسىمشا ايقىندالعان.

كرەديت بيۋرولارىنىڭ موبيلدى قوسىمشاسىنان وپەراتسيالىق جۇيەسىنىڭ قورعانىس تەتىكتەرىن بۇزۋ نەمەسە كليەنتتىڭ قۇرىلعىسىن قاشىقتان باسقارۋ بەلگىلەرى انىقتالسا، قاشىقتان قىزمەت كورسەتۋدى بۇعاتتاۋ كوزدەلگەن.

بۇل نورمالار كرەديت بيۋرولارىن باعدارلامالىق قامتىلىمنىڭ قاۋىپسىزدىك نورمالارىن كۇشەيتۋگە مىندەتتەيدى، بۇل ازاماتتار ءۇشىن ولاردىڭ دەرەكتەرىن وڭدەۋ كەزىندە قوسىمشا قورعانىس بولادى.

قۇجاتتا كرەديتتىك بيۋرولاردى اگەنتتىكتىڭ اقپاراتتىق قاۋىپسىزدىك سالالىق ورتالىعىنىڭ اقپاراتپەن الماسۋ جۇيەسىنە قوسۋ بويىنشا قوسىمشا تالاپتار ايقىندالعان.

بۇل كرەديت بيۋرولارىنىڭ اقپاراتتىق قاۋىپسىزدىكتى باسقارۋ جۇيەسىنىڭ جاي-كۇيى، سونداي-اق اقپاراتتىق قاۋىپسىزدىك وقيعالارى مەن وقىس جاعدايلارى تۋرالى اقپاراتتى ونلاين رەجيمدە الۋعا مۇمكىندىك بەرەدى.

اۆتور

جانات قاپالبايەۆا