ەلىمىزدە جىل سايىن جۇزدەن استام اسكەري ۇشقىش دايارلانادى
اقتوبە. KAZINFORM - بيىل كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتىنىڭ قۇرىلعانىنا 50 جىل تولدى.
ورتالىق ازياداعى اسكەري ۇشقىشتاردى دايارلايتىن جالعىز وقۋ ورنى اقتوبە قالاسىندا ورنالاسقان.
«ءبىزدىڭ ينستيتۋت 7 ماماندىق 15 بىلىكتىلىك بويىنشا اۋە قورعانىسى كۇشتەرى ماماندارىن دايارلايدى. ولاردىڭ قاتارىندا اسكەري اۆياتسيا، ياعني ۇشقىشتار، اسكەري مەديتسينا جانە اسكەري تەڭىز كۇشتەرى بار. كۋرسانتتار 4 جىل وقيدى، سول ءبىلىم الىپ، پراكتيكالىق تۇرعىدان شىڭدالادى. كۋرسانتتار مي-8 تىكۇشاعىنان بولەك L 39 ،FK 14 ،TL 2000 ،L 410 ۇشاقتارىندا بىلىكتىلىگىن ءىس جۇزىندە ارتتىرادى»، - دەدى اۋە قورعانىسى كۇشتەرى اسكەري ينستيتۋتى باستىعىنىڭ وقۋ-عىلىم جونىندەگى ءبىرىنشى ورىنباسارى، پودپولكوۆنيك ءسابيت كۋرتايەۆ قورعانىس مينيسترلىگىنىڭ ۇيىمداستىرۋىمەن وتكەن ب ا ق وكىلدەرىنە ارنالعان باسپا ءسوز تۋرى بارىسىندا.
ۇجىمدىق قاۋىپسىزدىك كەلىسىمى اياسىندا اۋە قورعانىسى كۇشتەرى اسكەري ينستيتۋتىندا ەلىمىزدەن بولەك تاجىكستان، قىرعىزستان ەلدەرىنەن كۋرسانتتار وقىپ، اسكەري ۇشقىش ماماندىعىن مەڭگەرىپ جاتىر.
«كۋرسانتتار تەگىن وقيدى، ءبىراق وقۋدى بىتىرگەن سوڭ كەلىسىم بويىنشا اۋە قورعانىسى كۇشتەرى سالاسىندا 10 جىل قىزمەت ەتۋگە مىندەتتى. سونىمەن قاتار كۋرسانتتارعا جوعارى وقۋ ورنىن ءتامامداعان سوڭ لەيتەنانت شەنى بەرىلەدى. ەڭ باستىسى كۋرسانتتار 100 پايىز جۇمىسپەن قامتىلىپ، اسكەريلەرگە تيەسىلى الەۋمەتتىك قولداۋ كورسەتىلەدى»، - دەيدى ول.
اسكەري ۇشقىش بولعىسى كەلەتىن تالاپكەرلەر ءۇش كەزەڭنەن تۇراتىن سىناق تاپسىرادى. الدىمەن جاس ءوسپىرىمنىڭ پسيحولوگيالىق جاي-كۇيى تەكسەرىلەدى، ەكىنشى فيزيكالىق دايىندىعى (سپورتتىق نورماتيۆ تاپسىرادى) جانە سوڭعىسى ۇ ب ت- دان جيناعان بالى ەسەپكە الىنادى (كەم دەگەندە 50 بال).
«ءبىزدىڭ ينستيتۋت 50 جىلدىڭ ىشىندە 5 مىڭنان استام تۇلەكتى ۇشىردى، جىلىنا شامامەن 100 دەن استام مامان دايارلايمىز»، - دەيدى پودپولكوۆنيك ءسابيت كۋرتايەۆ.
ونىڭ ايتۋىنشا، اسكەري ۇشقىشتار مەملەكەتتىك تاپسىرىس بويىنشا دايارلانادى. سوندىقتان دا كەلىسىمشارت بويىنشا كەمىندە 10 جىل اۋە قورعانىسى كۇشتەرىندە قىزمەت ەتۋى ءتيىس. كەلىسىم مەرزىمى بىتكەن سوڭ ازاماتتىق اۆياتسيادا اۋىسۋ مۇمكىندىگى بار.