ەلىمىزدە جاسوسپىرىمدەردى 12 جاستان قىلمىستىق جاۋاپقا تارتۋ ۇسىنىلدى
استانا. KAZINFORM - ءماجىلىس دەپۋتاتى ماگەررام ماگەرراموۆ كامەلەت جاسىنا تولماعاندار ءۇشىن قىلمىستىق جاۋاپكەرشىلىكتى 14-تەن 12 جاسقا دەيىن تومەندەتۋدى ۇسىندى.
دەپۋتات ءوز ساۋالىندا ۇلى بريتانيانى مىسالعا كەلتىرىپ، اتالعان ەلدە كامەلەتكە تولماعاندارعا قىلمىستىق جاۋاپكەرشىلىك جاسىنىڭ قايتا قارالعانىن ايتتى. ونىڭ ايتۋىنشا، بالالاردىڭ قوعامعا بەيىمدەلۋ پروتسەسى مەكتەپتەن باستالادى. وسى ورايدا وسكەلەڭ ۇرپاقتىڭ دەسترۋكتيۆتى مىنەز-قۇلقىنىڭ الدىن الۋدا ۇستازداردىڭ ىقپالى زور.
«زورلىق-زومبىلىقتى ءتۇپ-تامىرىمەن جويۋ قاجەت، وكىنىشكە قاراي، كامەلەتكە تولماعان اگرەسسورلار جاس ەرەكشەلىكتەرىنە بايلانىستى جازاسىز قالىپ جاتىر. بالكىم، ۇلى بريتانيانىڭ ۇلگىسى بويىنشا، بىزگە دە قىلمىستىق جاۋاپكەرشىلىككە تارتىلاتىن جاس شەگىن قايتا قاراۋىمىز كەرەك شىعار. كەيبىر قىلمىس تۇرلەرىن، مىسالى زورلاۋ فاكتىسى بويىنشا جاۋاپكەرشىلىكتى 14 جاستان ەمەس، 12 جاستان باستاپ قاراستىرۋ»، - دەدى م. ماگەرراموۆ دەپۋتاتتىق ساۋال جولداي وتىرىپ.
ونىڭ پايىمداۋىنشا، بۇل ماسەلەدە حالىقارالىق تاجىريبەگە جۇگىنگەن ءجون.
«مىسالى، جاپونيادا ءبىلىم مينيسترلىگى قورقىتىپ-ۇركىتىپ، قورلاۋعا قارسى كۇرەس جونىندەگى ارنايى كەڭەس قۇردى. ونىڭ قىزمەتى بالالار ءۇشىن قاۋىپسىز ورتا قۇرۋ ءۇشىن ەرەسەكتەردىڭ جاۋاپكەرشىلىگىن ارتتىرۋعا باعىتتالعان»، - دەپ اتاپ ءوتتى ماجىلىسمەن.
سونداي-اق، حالىق قالاۋلىسى كامەلەتكە تولماعاندارعا قۇقىقتىق تاربيە بەرۋدىڭ ارنايى ءادىسىن ەنگىزۋدى جانە ول تۋرالى بالالار مەن جاسوسپىرىمدەردى كەڭىنەن حاباردار ەتۋدى العا تارتتى.
دەپۋتات جاسوسپىرىمنىڭ كريمينوگەندىك مىنەز- قۇلقىنىڭ قالىپتاسۋىنا مورالدىق، قۇقىقتىق جانە باسقا دا الەۋمەتتىك فورمالاردىڭ ءبىرىڭعاي جۇيەسىنىڭ بولماۋى اسەر ەتەدى. ودان بولەك، م. ماگەرراموۆتىڭ مالىمدەۋىنشە، قوعامدا بولىپ جاتقان وقيعالار، اسكەردەگى ءولىم، بۋللينگ، الىمجەتتىك باسقا دا زورلىق-زومبىلىق جاسوسپىرىمنىڭ پسيحيكاسى مەن ءىس-ارەكەتىنە تىكەلەي ىقپالى بار.
اۆتور
داۋلەت ىزتىلەۋ