ەلىمىزدە جاساندى ينتەللەكت ينستيتۋتى اشىلماق
استانا. KAZINFORM - جاساندى ينتەللەكت قۇرالدارىنىڭ ىقتيمال تەرىس اسەرىن بولدىرماۋعا باعىتتالعان جاڭا رەگلامەنتتەر مەن ادىستەمەلىك ۇسىنىمدار ازىرلەنەدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
- پەداگوگتەردىڭ سيفرلىق قۇزىرەتتىلىگىن ارتتىرۋ ماقساتىندا ارنايى دايارلىق كۋرستارى ۇيىمداستىرىلىپ جاتىر. بۇگىندە 160 مىڭعا جۋىق پەداگوگ وقۋ پروتسەسىندە جاساندى ينتەللەكتىنى قولدانۋ بويىنشا وقىتۋدان ءوتتى (2024 -جىلى - 90 مىڭعا جۋىق، 2025 -جىلى - 70 مىڭ). وقۋ-اعارتۋ مينيسترلىگى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ، 2025 -جىلدىڭ قاڭتار ايىنان ەلىمىزدىڭ 180 مەكتەبىندە ورتا ءبىلىم بەرۋ ۇيىمدارىنىڭ وقۋشىلارى ءۇشىن باعدارلامالاۋ نەگىزدەرىن وقىتۋ كۋرسى جونىندەگى پيلوتتىق جوبانى جۇرگىزىپ جاتىر. پيلوتتىق مەكتەپتەردىڭ 10-11-سىنىپ وقۋشىلارى ءۇشىن وقۋ جوسپارىنىڭ ۆارياتيۆتىك كومپونەنتى ەسەبىنەن باعدارلامالاۋ نەگىزدەرى بويىنشا كۋرستار ەنگىزىلدى، - دەدى ۇكىمەت باسشىسى.
پرەمەر-ءمينيستردىڭ دەرەگىنشە، پيلوتتىق جوبا اياسىندا 2024 -جىلعى 16 - شىلدەدەن، باستاپ nFactorial جانە Omnium IT- مەكتەپتەرىندە جاساندى ينتەللەكت جانە Game Development باعىتتارى بويىنشا 180 پەداگوگ جانە «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ 120 جاتتىقتىرۋشىسى ارنايى وقىتۋ كۋرستارىنان ءوتتى.
- ونىڭ ۇستىنە ى. التىنسارين اتىنداعى ۇلتتىق ءبىلىم اكادەمياسىمەن (بۇدان ءارى - اكادەميا) وقۋشىلاردىڭ ءبىلىمىن باعالاۋ جانە اكادەميالىق ادالدىق تالاپتارىن جاڭارتۋ اياسىندا جاساندى ينتەللەكت قۇرالدارىنىڭ ىقتيمال تەرىس اسەرىن بولدىرماۋعا باعىتتالعان جاڭا رەگلامەنتتەر مەن ادىستەمەلىك ۇسىنىمدار ازىرلەنىن بولادى. سونىمەن قاتار اكادەميا جانىنان جاساندى ينتەللەكتىنى ءبىلىم بەرۋ جۇيەسىنە ەنگىزۋ جانە دامىتۋ بويىنشا ادىستەمەلىك، زەرتتەۋ، ەتيكالىق جانە وقۋ باعدارلامالارىن ۇيلەستىرۋ ءۇشىن جاساندى ينتەللەكت ينستيتۋتىن اشۋ جوسپارلانىپ وتىر، - دەدى ولجاس بەكتەنوۆ.
ايتا كەتەيىك، ەلىمىزدە سەگىز سالا بويىنشا ماماندار دايارلاۋ ءۇشىن ج ي قولداناتىن كاسىبي ستاندارت ازىرلەنىپ جاتىر.