ەلىمىزدە ازىق-تۇلىكتىڭ قىمباتتاۋ قاۋپى بار ما

استانا. KAZINFORM - پرەمەر-ءمينيستردىڭ ورىنباسارى سەرىك جۇمانعارين ازىق-تۇلىك باعاسىن تۇراقتاندىرۋ ماقساتىندا اتقارىلىپ جاتقان جۇمىستارعا توقتالدى.

«بىزدە الەۋمەتتىك ماڭىزى بار ازىق-تۇلىكپەن (ۇن، تۇز، كۇرىش، ماكارون، ماي، كارتوپ، قوي ەتى، سيىر ەتى، ءسابىز) 100 پايىز قامتىلعان. ودان بولەك، 14 ازىق-تۇلىك تۇرلەرىمەن 80 پايىزى ءوزىمىزدىڭ ءونىم. دەگەنمەن 5 ازىق-تۇلىك بويىنشا يمپورتقا تاۋەلدىلىك بار. جالپى العاندا قۇس ەتىمەن ءبىز ءوزىمىزدى 73 پايىزعا قامتاماسىز ەتەمىز، شۇجىق - 60 پايىز، بالىق - 60 پايىز، ىرىمشىك پەن سۇزبە - 46 پايىز، قانت - 44 پايىز»، - دەدى سەرىك جۇمانعارين ۇكىمەت وتىرىسىنان سوڭ وتكەن باسپا ءسوز ءماسليحاتىندا.

سونداي-اق، ۆيتسە-پرەمەر ەلىمىزدە وندىرىلمەيتىن كەيبىر كوكونىس، جەمىس-جيدەكتىڭ باعا تۇراقتىلىعىنا قاتىستى تاۋەكەل تۋىنداۋى مۇمكىندىگىن ايتتى.

«ولاردىڭ قاتارىندا اپەلسين، بانان، ليمون تاعى باسقا جەمىستەر بار، ياعني قىمباتتاۋى مۇمكىن، ءبىراق ايتارلىقتاي ەمەس. ءبىز تۇراقتى مونيتورينگ جۇرگىزىپ وتىرمىز، سوڭعى اپتادا ەشبىر تاۋار قىمباتتاعان جوق. ءبىراق، ينفلياتسيانى ۇمىتپاعانىمىز ءجون. بىزدە ينفلياتسيا ءدالىزى بار - بيىل 6-10 پايىز. بۇل باعانىڭ ورتاشا ءوسۋىن ءبىز وسى شەكتە كۇتەمىز دەگەندى بىلدىرەدى. ەكونوميكانىڭ دامۋى باعانىڭ ءبىز بەلگىلەگەن شەگىندە وسەدى»، - دەپ تولىقتىردى ۇكىمەت باسشىسىنىڭ ورىنباسارى.

اۆتور
داۋلەت ىزتىلەۋ