ەلىمىزدە اپتا ىشىندە بولعان كادرلىق تاعايىنداۋلار
استانا. KAZINFORM - ءوتىپ بارا جاتقان اپتا ىشىندە جەرگىلىكتى اكىمدىكتەر دەڭگەيىندە بىرنەشە كادرلىق اۋىس-ءتۇيىس بولدى
ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ قاراعاندى وبلىسى بويىنشا اۋماقتىق دەپارتامەنتىن ايرات قارامۇرزين باسقاراتىنى بەلگىلى بولدى.
بۇرىن ول وسى ۆەدومستۆودا باسشىنىڭ ورىنباسارى بولىپ جۇمىس ىستەگەن، سودان كەيىن باسشىنىڭ مىندەتىن اتقارعان.
ايرات قارامۇرزين - «ەلەكتر ەنەرگەتيكاسى» ماماندىعى بويىنشا تەحنيكا جانە تەحنولوگيالار ماگيسترى، سونداي-اق «قۇقىقتانۋ» ماماندىعى بويىنشا جوعارى ءبىلىمى بار.
قاراعاندى قالاسى قازىبەك ءبي اتىنداعى اۋدان اكىمى اپپاراتىندا ءتۇرلى لاۋازىمداردا جۇمىس ىستەدى. بالقاش قالاسىنىڭ ت ك ش، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى، بالقاش اكىمىنىڭ ورىنباسارى بولعان. 2022-جىلدىڭ قاراشاسىنان باستاپ اۋماقتىق ەنەرگەتيكالىق قاداعالاۋ دەپارتامەنتىندە جۇمىس ىستەدى.
الماتى وبلىسى اكىمىنىڭ وكىمىمەن ەرجان ءابىلحاسىم ۇلى سۇلەيمەنوۆ وبلىستىق دەنساۋلىق ساقتاۋ باسقارماسىنىڭ باسشىسى بولىپ تاعايىندالدى.
ول 1979-جىلى دۇنيەگە كەلگەن، مەديتسينا عىلىمدارىنىڭ دوكتورى.
ەڭبەك جولىن 2003-جىلى باستاعان. ءار جىلدارى دەنساۋلىق ساقتاۋ ۇيىمدارى مەن مەديتسينالىق ءبىلىم بەرۋ مەكەمەلەرىندە باسشىلىق قىزمەتتەر اتقارعان.
2015-2017-جىلدارى الماتى وبلىسى دەنساۋلىق ساقتاۋ باسقارماسى باسشىسىنىڭ ورىنباسارى بولدى.
2024-جىلدىڭ شىلدەسىنەن بەرى «Global Health Solutions» ج ش س- دا باس مەديتسينالىق كەڭەسشى بولىپ جۇمىس ىستەدى.
ال قاراعاندى وبلىسىنىڭ مادەنيەت، مۇراعاتتار جانە قۇجاتتاما باسقارماسىنىڭ باسشىسى بولىپ عالىمجان وتەلباي ۇلى تاعايىندالدى.
عالىمجان وتەلباي ۇلى قوجا احمەت ياساۋي اتىنداعى مەملەكەتتىك حالىقارالىق قازاق-تۇرىك ۋنيۆەرسيتەتىن جانە ءال-فارابي اتىنداعى قازاق ۇلتتىق ۋنيۆەرسيتەتىنىڭ ماگيستراتۋراسىن ءتامامداعان، تاريح ماگيسترى.
ەڭبەك جولىن ب ا ق- تا باستادى. قازاق راديوسىندا قوعامدىق-تانىمدىق باعدارلامالاردىڭ رەداكتورى، سونداي-اق قازاقستان ۇ ت ا رەداكتورى بولعان. ق ر مادەنيەت جانە اقپارات مينيسترلىگىندە ءتۇرلى لاۋازىمداردا جۇمىس ىستەدى.
2012-جىلى قاراعاندى وبلىسى مادەنيەت باسقارماسى باستىعىنىڭ ورىنباسارى، 2016-2018-جىلدارى الماتى قالاسى مادەنيەت جانە مۇراعاتتار باسقارماسىنىڭ باسشىسى بولدى. 2022-2024-جىلدارى ق ر مادەنيەت جانە اقپارات مينيسترلىگىنىڭ «قازاق اۋەندەرى» ا ق پرەزيدەنتى قىزمەتىن اتقاردى.
تاراز قالاسى اۋليەاتا اۋدانى اكىمى بولىپ بارلىق تورەحانوۆ تاعايىندالدى.
بارلىق تورەحانوۆ 1979-جىلى دۇنيەگە كەلگەن.
ەڭبەك جولىن 2000-جىلدان باستاعان:
سوڭعى جىلدارى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ جامبىل وبلىسى دەپارتامەنتى باسشىسىنىڭ ورىنباسارى جانە جوعارىدا اتالعان كوميتەتتىڭ الماتى وبلىسى بويىنشا دەپارتامەنتىنىڭ باسشىسى قىزمەتتەرىن اتقارعان.