ەلىمىزدە ارالاس جەكپە-جەكپەن قانشا ادام اينالىسادى

استانا. KAZINFORM - قازاقستاننىڭ م م ا ۇلتتىق قۇراما كومانداسى ازيادا 1-ورىندى جانە IMMAF- تە 3-ورىندى يەلەنەدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

«ەلىمىزدە 2013 -جىلدان باستاپ م م ا-نى رەسمي دامىتۋدى اككرەديتتەلگەن قازاقستاندىق م م ا ارالاس جاۋىنگەرلىك جەكپە-جەگى بويىنشا بىرىككەن فەدەراتسياسى (بۇدان ءارى - م م ا فەدەراتسياسى) جۇزەگە اسىرادى. 2019 -جىلى سپورت تۇرلەرىنىڭ تىزىمىنە «كاسىبي م م ا» سپورت ءتۇرى ەنگىزىلدى. قازاقستاندا 4 حالىقارالىق كلۋب (Alash Pride ،Octagon PROMOTION ،Naiza Fighting Championship، ەركىن كۇش) قىزمەتىن جۇزەگە اسىرادى. بۇل كلۋبتار جەكە زاڭدى تۇلعالار سانالادى جانە جەكە قاراجات ەسەبىنەن قارجىلاندىرىلادى. بۇگىنگى كۇنى ەلىمىزدە 23 مىڭنان استام ادام شۇعىلداناتىن 592 سەكسيا جۇمىس ىستەيدى. ولاردى دايارلاۋمەن 193 جاتتىقتىرۋشى اينالىسادى. وڭىرلەردە اككرەديتتەلگەن م م ا فەدەراتسيالارى قىزمەت اتقارادى. سونىمەن قاتار وبلىستىق جوعارى سپورت شەبەرلىگى جانە بالالار-جاسوسپىرىمدەر سپورت مەكتەپتەرىندە 13 م م ا بولىمشەلەرى (اباي، اتىراۋ، الماتى، جامبىل، باتىس قازاقستان، قاراعاندى، سولتۇستىك قازاقستان، تۇركىستان وبلىستارى جانە شىمكەنت ق. ) اشىلدى»، - دەدى ولجاس بەكتەنوۆ جاۋابىندا.

ونىڭ اتاپ وتۋىنشە، وقۋ-جاتتىعۋ جيىندارى، قازاقستان رەسپۋبليكاسىنىڭ چەمپيوناتتارى، كۋبوكتارى تۇراقتى تۇردە وتكىزىلەدى. بارلىعى 94 سپورتشىدان قۇرالعان ۇلتتىق قۇراما كوماندالارى (ونىڭ ىشىندە جاسوسپىرىمدەر - 30 ادام، جاستار - 32 ادام، ەرەسەكتەر - 32 ادام) جىل سايىن الەم جانە ازيا چەمپيوناتتارىنا قاتىسادى.

«بۇگىنگى تاڭدا م م ا ۇلتتىق قۇراما كومانداسى ازيادا 1-ورىندى جانە IMMAF- حالىقارالىق ارالاس جاۋىنگەرلىك ونەر فەدەراتسياسىنىڭ حالىقارالىق ۇيىمىنا مۇشە 130 ەلدىڭ ىشىندە الەمدە 3-ورىندى يەلەنەدى. قازىرگى ۋاقىتتا مەملەكەت باسشىسىنىڭ تاپسىرماسى اياسىندا پارلامەنت ءماجىلىسىنىڭ قاراۋىنداعى زاڭ جوباسى اياسىندا مەملەكەتتىك بيۋدجەت قاراجاتى ەسەبىنەن قارجىلاندىرىلاتىن سپورت تۇرلەرىن قىسقارتۋ جوسپارلانۋدا. وندا رەسپۋبليكالىق بيۋدجەت قاراجاتى ەسەبىنەن تەك ۇلتتىق سپورت تۇرلەرىن، وليمپيادالىق، پاراليمپيادالىق، سۋردليمپيادالىق، ازيالىق، ازيا پارا ويىندارىنىڭ باعدارلامالارىنا ەنگىزىلگەن جانە جوعارى سپورتتىق ناتيجەلەرى بار سپورت تۇرلەرىن قارجىلاندىرۋ جوسپارلانۋدا. باياندالعاننىڭ نەگىزىندە بۇل سپورت ءتۇرىن دامىتۋ جۇمىستارىن م م ا فەدەراتسياسى جالعاستىراتىن بولادى»، - دەدى ۇكىمەت باسشىسى.

اۆتور
اسحات رايقۇل