ەلىمىزدە العاش رەت مەكتەپ KASE دە وبليگاتسيا شىعاردى
استانا. قازاقپارات - الماتى قالاسىنداعى ش. ءۋاليحانوۆ اتىنداعى جەكەمەنشىك مەكتەپ (Shoqan School) قازاقستاندا العاش رەت ءبىلىم بەرۋ مەكەمەسى رەتىندە قازاقستان قور بيرجاسىندا (KASE) وبليگاتسيا ورنالاستىردى.
KASE ليستينگتىك كوميسسياسى 2025-جىلعى 22-مامىردا وبليگاتسيالاردى رەسمي تىزىمگە ەنگىزۋ تۋرالى شەشىم قابىلدادى.
ليستينگكە وبليگاتسيالار KZ2P00013881 كودى بويىنشا، نومينالى 1000 تەڭگە، جالپى كولەمى 1 ميلليارد تەڭگە جانە اينالىم مەرزىمى 3 جىلدىق بولىپ قوسىلدى. وبليگاتسيالار بويىنشا جىلدىق تابىس !,00 دەڭگەيىندە بەلگىلەنگەن. كۋپون تولەمدەرى توقسان سايىن جۇرگىزىلەدى، ال پايىزداردى ەسەپتەۋ ءادىسى - 30/360.
ش. ءۋاليحانوۆ اتىنداعى جەكەمەنشىك مەكتەپ 2020-جىلى الماتى قالاسىندا اشىلدى. مەكتەپتىڭ نەگىزىن قالاۋشىلار - ەكولوگ اسەل تاسماعامبەتوۆا مەن قازاقستاندىق كاسىپكەر كەڭەس راكيشيەۆ. قازىرگى تاڭدا مەكتەپتە 1200 وقۋشى ءبىلىم الۋدا، سونداي-اق Shoqan School-دا دارىندى وقۋشىلارعا ارنالعان گرانتتار قاراستىرىلعان. مەكتەپتىڭ اشىلۋىنان بەرى نەگىزىن قالاۋشىلاردىڭ قاراجاتىنان 173 ميلليون تەڭگەدەن استام سوماعا گرانتتار ءبولىندى.
2025-جىلى ش. ءۋاليحانوۆ اتىنداعى جەكەمەنشىك مەكتەپتىڭ ءۇش وقۋشىسى گارۆارد ۋنيۆەرسيتەتىنە جانە كاليفورنيا ۋنيۆەرسيتەتىنىڭ بەركلي فيليالىنا قابىلداندى. بۇل وقۋشىلار مەكتەپتە العاش رەت ىسكە قوسىلعان مەنتورلىق باعدارلاما اياسىندا وقۋعا ءتۇستى. اتالعان باعدارلاما مەكتەپتىڭ نەگىزىن قالاۋشىلار - كاسىپكەر كەڭەس راكيشيەۆ پەن ەكولوگ اسەل تاسماعامبەتوۆانىڭ باستاماسىمەن جۇزەگە اسىرىلۋدا.
- وبليگاتسيالاردى شىعارۋ تۋرالى شەشىم ۇزاق مەرزىمدى دامۋ جوسپارلارىن ەسكەرە وتىرىپ قابىلداندى. سىرتقى ينۆەستيتسيالاردى تارتۋ وقۋ ورداسىنا تۇراقتى دامۋ سالاسىندا ءبىرقاتار ءىرى جوبالاردى جۇزەگە اسىرۋعا مۇمكىندىك بەرەدى جانە قازاقستاننىڭ دارىندى وقۋشىلارىن قولداۋدى جالعاستىرۋعا جول اشادى، - دەدى ەكولوگ، ش. ءۋاليحانوۆ اتىنداعى جەكە مەكتەپتىڭ نەگىزىن قالاۋشى اسەل تاسماعامبەتوۆا.
وبليگاتسيالاردى شىعارۋ بويىنشا قارجىلىق كونسۋلتانت - الماتى قالاسىنداعى «Tenyz Capital Investment Banking» اكسيونەرلىك قوعامى. وبليگاتسيالاردىڭ ساۋدا كودى - SWPSb1.
قۇندى قاعازداردى قور نارىعىنا شىعارۋ ءبىلىم بەرۋ ينفراقۇرىلىمىن كەڭەيتۋ جانە ۇزاق مەرزىمدى ستراتەگيالىق جوبالاردى جۇزەگە اسىرۋ ءۇشىن جاڭا مۇمكىندىكتەر اشادى. ليستينگتىك كوميسسيانىڭ شەشىمى كۇشىنە ەنۋ كۇنى مەن وبليگاتسيالار بويىنشا ساۋدانىڭ باستالۋ كۇنى قوسىمشا حابارلاناتىن بولادى. قۇجاتتىڭ تولىق ءماتىنى مەن قوسىمشا اقپاراتتى KASE رەسمي سايتىنان الۋعا بولادى.