ەلىمىزدە 6500 ادۆوكاتقا سۇرانىس بار
استانا. KAZINFORM - ورگاندار مەن جۇمىس بەرۋشىلەرگە ءبىلىم بەرۋ باعدارلامالارى مازمۇنىن وزگەرتۋگە رۇقسات بەرىلەدى. بۇل تۋرالى سەناتتا ءوتىپ جاتقان پارلامەنتتىك تىڭداۋدا عىلىم جانە جوعارى ءبىلىم ءمينيسترى ساياسات نۇربەك ايتتى.
- بىلتىردان باستاپ 15 جاڭا وقۋ باعدارلاماسى ەنگىزىلدى. ولاردىڭ ىشىندە سيفرلىق كريميناليستيكا، IT- قۇقىق، IT سالاسىنداعى قىلمىستىق زاڭ بۇزۋشىلىقتارعا قارسى كۇرەس، جاساندى ينتەللەكت، سيفرلاندىرۋ سىندى ۇردىستەرگە بەيىمدەلگەن باعدارلامالار بار. ەڭبەك نارىعىنىڭ ناقتى سۇرانىسىنا جاۋاپ بەرۋ ءۇشىن جاقسى جۇمىس باستالدى. قازىرگى تاڭدا 6,5 مىڭنان استام ادۆوكاتقا سۇرانىس بار. دوسمۇحامبەتوۆ ۋنيۆەرسيتەتىندە اتىراۋ وبلىستىق ادۆوكاتتار القاسىنىڭ قولداۋىمەن العاش رەت باكالاۆريات جانە ماگيستراتۋرا دەڭگەيىندە «ادۆوكاتتىق ءىس» ءبىلىم باعدارلاماسى ازىرلەندى. ەندى ءبىز ادۆوكاتۋرا، پروكۋراتۋرا ورگاندارى ج و و-لارمەن تىكەلەي جۇمىس ىستەيدى. وقۋ باعدارلامالارىنىڭ مازمۇنىن وزگەرتۋگە جۇمىس بەرۋشىلەرگە جانە ورگاندارعا رۇقسات بەرەمىز. مەملەكەتتىك ستاندارت وزگەردى. ج و و جانىندا وسىنداي ارنايى ادىسدەمەلىك كەڭەستەر قۇرىلىپ جاتىر، - دەدى ول.
ونىڭ اتاپ وتۋىنشە، م Maqsut Narikbayev University-دە ءبىلىم باعدارلاماسىنىڭ سالالىق ۇيىمدار مەن قاۋىمداستىقتاردىڭ كاسىبي اككرەديتاتسياسى ەنگىزىلدى.
- ەندى وقۋ باعدارلاماسى تەك قانا مينيسترلىك دەڭگەيىندە اككرەديتاتسيادان وتپەي، سىرتتان تاۋەلسىز كاسىبي قاۋىمداستىقتار - ادۆوكاتتار پالاتاسى نەمەسە جۇمىس بەرۋشىلەر قوسىمشا اككرەديتاتسيا بەرەدى. بۇل تاجىريبە باسقا ج و و-لارعا دا تاراتىلۋدا. ءبىلىم باعدارلاماسىن الەمدىك كونتەنتپەن تولىقتىرۋ ماقساتىندا 2023 -جىلدان باستاپ بارلىق ستۋدەنتكە Coursera پلاتفورماسى قولجەتىمدى بولدى. 4200 كۋرستى قازاق جانە ورىس تىلدەرىنە اۋدارىپ بەردىك. ونىڭ ىشىندە زاڭ سالاسىندا ەڭ سوڭعى، مىقتى كۋرستار دا بار. زاڭ سالاسى بويىنشا Coursera پلاتفورماسىندا 49 كۋرستى 2 764 ستۋدەنت وقىپ، 1765 سەرتيفيكات الدى، - دەدى ساياسات نۇربەك.
بۇعان دەيىن سەنات ءتوراعاسى ماۋلەن اشىمبايەۆ زاڭ سالاسىنداعى مامانداردىڭ سانى بار دا ساپاسى جوق ەكەنىن ايتقان بولاتىن.
ال بۇگىندە بولاشاق مامانداردىڭ 97 پايىزى اقىلى نەگىزدە ءبىلىم الىپ جاتىر.
اۆتور
مارلان جيەمباي