ەلىمىزدە 130 مىڭ ورىندىق 86 جاڭا مەكتەپ اشىلدى
استانا. KAZINFORM - وقۋ جىلىنىڭ باسىنان بەرى وڭىرلەردە 130 مىڭ وقۋشىعا ارنالعان 86 مەكتەپ اشىلدى، دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.
مەملەكەت باسشىسىنىڭ باستاماسىمەن جۇزەگە اسىرىلىپ جاتقان «جايلى مەكتەپ» ۇلتتىق جوباسى اياسىندا 74,8 مىڭ وقۋشىعا ارنالعان 27 مەكتەپ، ونىڭ ىشىندە استانادا توعىز مەكتەپ اشىلدى.
جوبادا ءبىلىم بەرۋ ورتاسىنىڭ فۋنكتسيونالدىعى مەن قاۋىپسىزدىگىنە ەرەكشە نازار اۋدارىلعان. باستاۋىش جانە جوعارى سىنىپ وقۋشىلارى ءۇشىن بولەك بلوكتار قاراستىرىلعان. تالاپتاردىڭ قاتارىندا قازىرگى زامانعى تەحنيكالىق قۇرالداردى ەنگىزۋ ارقىلى قاۋىپسىزدىك شارالارىن ارتتىرۋ، ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتا قۇرۋ جانە مەكتەپتەردى زاماناۋي پاندىك كابينەتتەرمەن قامتاماسىز ەتۋ بار.
ايتا كەتەيىك، «جايلى مەكتەپ» ۇلتتىق جوباسى اياسىندا 2025 -جىلدىڭ سوڭىنا دەيىن زاماناۋي فورماتتاعى 217 مەكتەپتى پايدالانۋعا بەرۋ جوسپارلانۋدا.
«ءبىلىم بەرۋ ينفراقۇرىلىمىن قولداۋ قورى ارقىلى 18 مەكتەپ اشىلدى، تاعى 41 مەكتەپ رەسپۋبليكالىق جانە جەرگىلىكتى بيۋدجەت قاراجاتى، سونداي- اق ينۆەستيتسيالار ەسەبىنەن قولدانىسقا بەرىلدى»، - دەلىنگەن حابارلامادا.
وسىعان دەيىن جەكەمەنشىك مەكتەپتەرگە اۋىساتىن وقۋشىلار قاتارى ارتىپ كەلە جاتقانى تۋرالى جازدىق.