ەلىمىزگە قانشا ەتنيكالىق قازاق ورالدى؟

 2023 -جىلعى 1-قازانداعى جاعداي بويىنشا 16408 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 -جىلدان بەرى رەسپۋبليكاعا 1 ميلليون 123,5 مىڭ ەتنيكالىق قازاق ورالدى، دەپ حابارلايدى Kazinform. 

جىل باسىنان بەرى قازاقستانعا كەلگەن قانداستاردىڭ جارتىسى (53,7 پايىز) - وزبەكستاننان، 19,3 پايىز - قىتايدان، 10,9 پايىز - موڭعوليادان، 7,7 پايىز - رەسەيدەن، 6,3 پايىز - تۇرىكمەنستاننان جانە 2,1 پايىز باسقا ەلدەردەن.

وسى جىلعى 1-قازانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى - 61,2 پايىز، ەڭبەككە قابىلەتتى جاستان كىشى - 30,3 پايىز، زەينەتكەرلەر - 8,5 پايىز.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15,5 پايىز - جوعارى ءبىلىمدى، 34,4 پايىز - ورتا كاسىبي ءبىلىمدى، 41,5 پايىز - جالپى ورتا ءبىلىمدى، جانە 8,6 پايىز ءبىلىم جوق.

قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.

سونىمەن بىرگە، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.

قونىستاندىرۋ وڭىرلەرىندە 2023 -جىلعا ارنالعان قانداستاردى قابىلداۋ كۆوتاسى - 1925 ادام. 2023 -جىلعى 1-قازانداعى جاعداي بويىنشا قونىستاندىرۋ وڭىرلەرىنە 1870 قانداس قونىس اۋداردى.

جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءار مۇشەسىنە 70 ا ە ك (241,5 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15 تەن 30 ا ە ك (51,7-دەن 103,5 مىڭ تەڭگەگە دەيىن) مولشەرىندە.

جىل باسىنان بەرى 1254 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 522 ادام تۇراقتى جۇمىسقا ورنالاستىرىلدى، 1254 ادام ءبىرجولعى سۋبسيديا الدى، ال 513 قانداسقا تۇرعىن ءۇي شىعىندارى سۋبسيديالاندى.

سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى.

تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50 پايىز نەمەسە ءبىر وتباسىنا 4 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.

ەستەرىڭىزگە سالا كەتەيىك، وسى جىلى پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلدى.

پيلوتتىق جوبا شەڭبەرىندە ەلىمىزگە بارۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى.

بۇگىنگى تاڭدا رەسپۋبليكانىڭ شەت ەلدەردەگى مەكەمەلەرى ارقىلى ەتنيكالىق قازاقتاردان جاڭا فورماتتا 2037 ءوتىنىش (681 وتباسى) قابىلداندى.

اۆتور

جانات قاپالبايەۆا