ۇلىمدى اڭدىپ جۇرگەندەر بار سياقتى: داۋلەت تۇرلىحانوۆ بالاسى تاپ بولعان داۋلى وقيعا تۋرالى

استانا. KAZINFORM - ءماجىلىس دەپۋتاتى داۋلەت تۇرلىحانوۆ ۇلىنىڭ باسىنداعى داۋعا بايلانىستى پىكىر ءبىلدىردى.

ءماجىلىس وتىرىسىنىڭ الدىندا جۋرناليستەر دەپۋتاتتان ۇلىنىڭ نەگە داۋلى وقيعا تاپ بولا بەرەتىنىن سۇرادى.

«جاس بالا تۋعان كۇنگە بارعان. ۇنەمى ونىمەن اڭگىمەلەسىپ تۇرامىن. زاڭ بۇزۋعا بولمايتىنىن ايتام»، - دەدى د. تۇرلىحانوۆ.

«ياعني، ۇلىڭىز تىڭداماي ءجۇر مە؟»، - دەپ سۇرادى جۋرناليست.

دەپۋتات ۇلىن تاربيەلى بالا دەپ ەسەپتەيتىنىن ايتادى.

«سولاي شىعار... ايتايىن دەگەنىم، قاي اكە بالاسىن جامان بولسىن دەپ تاربيەلەيدى؟.. قولدان كەلگەنشە تاربيە بەردىك، اقىلىمدى ايتىپ ءجۇردىم. بالا ءبىراق جاقسى، جاقسى بالا. ءبىراق مەن ءۇشىن بە، بىلمەيمىن، بالانىڭ ارتىنان اڭدۋ بار. ايتپەسە 21 دەگى بالا. ەرتەڭ ول بالا جۇيكەسى توزىپ، اۋرۋ بولىپ كەتۋى مۇمكىن. وعان كىم جاۋاپتى؟ ايتايىن دەگەنىم، بالام وتە جاقسى بالا، تاربيەلى. بۇگىنگى كۇنى ونىڭ ارتىنان اڭدىپ ەندى... تۋعان كۇنگە بارۋعا بولماي ما؟ ءوزىنىڭ جاسىنداعى دوستارىمەن ارالاسۋعا بولماي ما؟ سول جاعى دا مەن قاتتى ويلاندىرادى»، - دەدى ول.

دەپۋتات ۇلىنىڭ باسىنداعى داۋ ونىڭ دەپۋتاتتىق مانداتىنا اسەر ەتپەۋى كەرەك دەپ ەسەپتەيتىنىن جەتكىزدى.

«مەن ءبىرمانداتتىق وكرۋگتەن سايلاندىم. مانداتىمدى تاپسىرام با، جوق پا، ونى سايلاۋشىلارىم عانا شەشە الادى. بۇگىندە مەن ەل ازاماتى رەتىندە ەلىمىزدىڭ بولاشاعى ءۇشىن وتە ابىرويمەن جۇمىس ىستەپ جاتىرمىن. مەنىڭ جۇمىسىما ارىپتەستەرىمنەن ەشقانداي سۇراق جوق»، - دەدى داۋلەت تۇرلىحانوۆ.

دەپۋتات بالاسىنىڭ ارەكەتتەرى باس بوستاندىعىنان ايىرۋ جازاسىن تاعايىنداۋعا نەگىز بولا المايدى دەپ ەسەپتەيتىنىن دە ايتتى.

«21 دەگى بالا ءالى. ەندى قالاي ايتۋعا بولادى؟ ءومىردى ءالى كورمەگەن بالا. ونى باس بوستاندىعىنان نە ءۇشىن ايىرۋ كەرەك؟ ساعات كەشكى 20.30-دا ارىپتەستەرىمەن وتىرعان عوي. ءىشىپ وتىرعان جوق ول جەردە. ول بالا ىشپەيدى. ءويتىپ بىردەن تۇرمەگە قامايتىن بولساق، وندا ول دۇرىس بولمايدى. ول تاربيە ەمەس»، - دەدى دەپۋتات.

سونداي-اق، ول جۋرناليستىڭ «دەنساۋلىعىنا الاڭدايمىن دەپ وتىرسىز. سوندا ول ءوز-وزىنە قول جۇمساۋى مۇمكىن بە؟»، - دەگەن سۇراعىنا «ءبارى بولۋى مۇمكىن»، - دەپ جاۋاپ بەردى.

«شىن ايتايىن. كۇن سايىن جازادى. تەلەفوندا ءبارى جازىپ جاتىر. بىرەۋ جاقسى ايتسا، بىرەۋ جامان ايتىپ جاتىر. ول بالا دا ويلانادى. ول بالاعا جانىم اشىپ ءجۇر. ۇيقىسى جوق»، - دەيدى ءماجىلىس دەپۋتاتى.

ەسكە سالساق، بۇعان دەيىن دەپۋتاتىڭ ۇلى نۇراسىل بولات پروباتسيالىق باقىلاۋدى ەلەمەگەنى ءۇشىن باس بوستاندىعىنان ايىرىلۋى مۇمكىن ەكەنى ايتىلعان.

اۆتور
ەسىمجان ناقتىباي