ليۆاننىڭ سولتۇستىگىندەگى اۋىلعا جاسالعان سوققىدان 20-دان استام قازا تاپتى

استانا. KAZINFORM - ليۆاننىڭ سولتۇستىگىندە يزرايل اۋە كۇشتەرىنىڭ شابۋىلىنان كەمىندە 21 ادام قازا تاپتى، دەپ حابارلادى بيلىك. بۇل تۋرالى BBC جازدى.

ليۆان دەنساۋلىق ساقتاۋ مينيسترلىگىنىڭ مالىمەتىنشە، شابۋىل نەگىزىنەن حريستياندار تۇراتىن ايتۋ كەنتىنە جاسالعان.

بۇل جەر يزرايل اسكەرى ادەتتە شابۋىل جاسايتىن بەيرۋت پەن باسقا ايماقتاردان ءبىرشاما الىس.

وقيعا ورنىنان الىنعان اقپاراتقا سايكەس، سوققى سالدارىنان تۇرعىن ءۇي تولىعىمەن قيرادى. جەرگىلىكتى تۇرعىنداردىڭ ايتۋىنشا، وندا ليۆاننىڭ وڭتۇستىگىنەن سولتۇستىككە جاقىندا كوشىپ كەلگەن وتباسىلار تۇرعان.

يزرايل سوققىعا قاتىستى ءالى تۇسىنىكتەمە بەرگەن جوق، ءبىراق دۇيسەنبى كۇنى پرەمەر-مينيستر بينيامين نەتانياحۋ «بۇكىل ليۆانداعى «حەزبوللاعا» سوققى جاساۋدى جالعاستىرۋعا» ۋادە بەردى.

ول بۇل مالىمدەمەسىن جەكسەنبىدە «حەزبوللانىڭ» ۇشقىشسىز باسقارىلاتىن ۇشاعىنىعىڭ شابۋىلىنان يزرايلدىك ءتورت سارباز قازا تاۋىپ، ونداعان ادام جاراقات العان يزرايلدىڭ سولتۇستىگىندەگى اسكەري بازاعا ساپارى كەزىندە جاسادى.

بۇل ليۆاندىق توپتىڭ سوڭعى جىلدا يزرايلگە جاساعان ەڭ ءىرى شابۋىلى بولدى.

سودىرلار شابۋىلدىڭ ليۆاندا 1700-گە جۋىق ادامنىڭ ءومىرىن قيعان سوققىلارعا جاۋاپ رەتىندە جاسالعانىن مالىمدەدى.

اۆتور
ەركەجان سماعۇلوۆا