ليۆانداعى جاعداي: فرانسيا ب ۇ ۇ قاۋىپسىزدىك كەڭەسىنەن شۇعىل جينالىس وتكىزۋدى سۇرادى

استانا. KAZINFORM - فرانسيا يزرايل «حەزبوللاعا» قارسى وپەراتسياسىنىڭ باستالعانىن جاريالاعاننان كەيىن ليۆانداعى جاعدايدى تالقىلاۋ ءۇشىن ب ۇ ۇ قاۋىپسىزدىك كەڭەسىنىڭ شۇعىل وتىرىسىن شاقىرۋدى سۇرايدى.

- مەن وسى اپتادا ليۆانعا قاتىستى قاۋىپسىزدىك كەڭەسىنىڭ شۇعىل وتىرىسىن وتكىزۋدى سۇرادىم،- دەدى فرانسيانىڭ سىرتقى ىستەر ءمينيسترى جان- نوەل باررو ب ۇ ۇ باس اسسامبلەياسىنىڭ وتىرىسىندا.

ال بىرىككەن اراب امىرلىكتەرىنىڭ (ب ا ءا) سىرتقى ىستەر مينيسترلىگى «يزرايلدىڭ ليۆاننىڭ وڭتۇستىگىنە جاساعان شابۋىلدارىنا قاتتى الاڭداۋشىلىق ءبىلدىردى».

سىرتقى ىستەر مينيسترلىگى تاراتقان مالىمدەمەدە ءابۋ-دابي «مەملەكەتتىك قاتىناستار مەن ەگەمەندىكتى رەتتەيتىن زاڭداردى ەلەمەيتىن زورلىق-زومبىلىق، شيەلەنىس، ويلاستىرىلماعان ارەكەتتەر مەن رەاكسيالاردى قابىلدامايدى» دەپ اتاپ كورسەتىلگەن.

ساۋد ارابياسىنىڭ سىرتقى ىستەر مينيسترلىگى ليۆانداعى وقيعالاردى «ۇلكەن الاڭداۋشىلىقپەن» باقىلاپ وتىرعانىن ايتىپ، بارلىق تاراپتاردى بارىنشا سابىرلى بولۋعا شاقىردى.

ەر- رياد، سونداي-اق، حالىقارالىق قاۋىمداستىق پەن مۇددەلى تاراپتاردى ء«وز رولدەرىن ويناۋعا جانە ايماقتاعى بارلىق قاقتىعىستاردى توقتاتۋعا جاۋاپتى كوزقاراس كورسەتۋگە» شاقىرىپ، «ليۆاننىڭ ەگەمەندىگىن قۇرمەتتەۋدىڭ ماڭىزدىلىعىن» اتاپ ءوتتى.

يزرايل دۇيسەنبى كۇنى ليۆانداعى «حەزبوللا» قوزعالىسىنىڭ نىساندارىنا جاپپاي سوققى بەرە باستادى.

ليۆان دەنساۋلىق ساقتاۋ مينيسترلىگىنىڭ مالىمەتىنشە، يزرايلدىڭ ەلدەگى اۋە شابۋىلىنان قازا تاپقاندار سانى كەم دەگەندە 492 گە جەتىپ، 1640 تان استامى جارالانعان. قازا تاپقاندار اراسىندا 35 بالا مەن 58 ايەل بار.