ۇسىنىلعان قالالار اراسىندا شيپاجايداعى ءبىر تاۋلىكتىڭ ەڭ جوعارى قۇنى الماتىدا تىركەلگەن — 200 مىڭ تەڭگەگە دەيىن. استانا مەن قونايەۆتا بۇل كورسەتكىش 180 مىڭ تەڭگەگە جەتەدى. الايدا وسى ەكى قالاداعى ەڭ تومەنگى باعا بىردەي ەمەس: ەلوردادا شيپاجايدا ەمدەلۋ مەن تىنىعۋ 12 مىڭ تەڭگەدەن باستالسا، قونايەۆتا 10 مىڭ تەڭگەدەن باستالادى.
تاۋلىگىنە 10 مىڭ تەڭگەدەن باستالاتىن ەڭ قولجەتىمدى ۇسىنىستار قاراعاندى، قوستاناي جانە قونايەۆ قالالارىندا بار. دەگەنمەن باعانىڭ جوعارعى شەگى بۇل قالالاردا ءارتۇرلى: قاراعاندىدا 98 مىڭ تەڭگەگە، قوستانايدا 96 مىڭ تەڭگەگە، ال قونايەۆتا 180 مىڭ تەڭگەگە دەيىن جەتەدى. بۇل باستاپقى باعاسى تومەن شيپاجايلاردىڭ ءبارى بىردەي ارزان دەگەندى بىلدىرمەيدى. تاڭداۋ اياسى كەڭەيگەن سايىن قىزمەت قۇنى دا ەداۋىر ءوسۋى مۇمكىن.
الماتىدا شيپاجايدا ءبىر تاۋلىك تىنىعۋ مەن ەمدەلۋ قۇنى 20 مىڭنان 200 مىڭ تەڭگەگە دەيىن بارادى. بۇل — سالىستىرىلىپ وتىرعان قالالار اراسىنداعى ەڭ جوعارى شەكتى باعا. استانادا تاۋلىكتىك قۇن 12 مىڭنان 180 مىڭ تەڭگەگە دەيىن، ال قونايەۆتا 10 مىڭنان 180 مىڭ تەڭگەگە دەيىن وزگەرەدى. اتالعان ءۇش قالادا ەڭ تومەنگى جانە ەڭ جوعارى باعانىڭ اراسى ەداۋىر الشاق.
كوكشەتاۋدا شيپاجايدا ءبىر تاۋلىك ەمدەلىپ، تىنىعۋ قۇنى 20 مىڭنان 125 مىڭ تەڭگەگە دەيىن جەتەدى. قاراعاندىدا باعا 10 مىڭنان 98 مىڭ تەڭگەگە دەيىن، قوستانايدا 10 مىڭنان 96 مىڭ تەڭگەگە دەيىن، ال تۇركىستاندا 20 مىڭنان 95 مىڭ تەڭگەگە دەيىن وزگەرەدى. پاۆلوداردا ءبىر تاۋلىكتىڭ قۇنى 22,5 مىڭ تەڭگەدەن باستالىپ، 68 مىڭ تەڭگەگە دەيىن بارادى.
باعا ايىرماشىلىعى سالىستىرمالى تۇردە تومەن قالالاردا شيپاجاي قىزمەتتەرىنىڭ قۇنى دا ءبىر- بىرىنە جاقىن. ورالدا ءبىر تاۋلىك تىنىعۋ مەن ەمدەلۋ 25 مىڭنان 35 مىڭ تەڭگەگە دەيىن تۇرسا، تالدىقورعاندا 22 مىڭنان 30 مىڭ تەڭگەگە دەيىن جەتەدى. اقتاۋ مەن تارازدا باعا 17,5 مىڭنان 25 مىڭ تەڭگەگە دەيىن وزگەرەدى. جەزقازعاندا شيپاجايدا ءبىر تاۋلىك بولۋ قۇنى 15 مىڭنان 25 مىڭ تەڭگەگە دەيىن بولسا، شىمكەنتتە 17 مىڭنان 25 مىڭ تەڭگە ارالىعىندا.
اتىراۋدا شيپاجايداعى ءبىر تاۋلىكتىڭ قۇنى 18,5 مىڭنان 42 مىڭ تەڭگەگە دەيىن جەتەدى. اقتوبە مەن وسكەمەندە بۇل كورسەتكىش 20 مىڭنان 50 مىڭ تەڭگەگە دەيىن وزگەرەدى. سەمەيدە باعا 18 مىڭنان 47 مىڭ تەڭگەگە دەيىن، پەتروپاۆلدا 17,5 مىڭنان 30 مىڭ تەڭگەگە دەيىن بولسا، قىزىلوردادا 25 مىڭنان 50 مىڭ تەڭگەگە دەيىن بارادى.
وسىلايشا، ۇسىنىلعان قالالار اراسىندا شيپاجايدا ءبىر تاۋلىك تىنىعۋ مەن ەمدەلۋدىڭ ەڭ تومەنگى باعاسى قاراعاندىدا، قوستانايدا جانە قونايەۆتا تىركەلگەن. ال ەڭ جوعارى باعا الماتىدا، استانادا جانە قونايەۆتا ۇسىنىلادى. دەگەنمەن شيپاجاي تاڭداعاندا تەك جولداما قۇنىنا قاراپ شەشىم قابىلداۋ جەتكىلىكسىز. باعاعا تۇرۋ، تاماقتانۋ، ەمدىك- ساۋىقتىرۋ پروتسەدۋرالارى مەن قوسىمشا قىزمەتتەردىڭ قايسىسى كىرەتىنىن دە ناقتىلاعان ءجون.
بۇعان دەيىن ەلىمىزدە شيپاجايدا ەمدەلۋگە مەملەكەت تاراپىنان قانداي قولداۋ كورسەتىلەتىنى تۋرالى جازعانبىز.