ارادا قاپتاعان بەيساۋات دەلدال جوق. جايىلىمنان سورەگە دەيىنگى بار شارۋانى ءبىر عانا مەكەمە اتقارادى. تاقاۋدا عانا جۇزەگە اسا باستاعان بۇل ءىس باعا جاعىنان دا ءتيىمدى.
قازاقستاننان كەلگەن قوي ەتى دۋباي نارىعىندا قازىر كەلىسىنە 45 ديرحامنان ساتىلىپ جاتىر. بۇل - پرەميۋم باعا. بىزدىڭشە 5500 تەڭگە. شارۋانىڭ جايىلىمنان سورەگە دەيىنگى بارلىق شىعىنىن وتەۋگە جەتىپ تۇر. اپتاسىنا بىرنەشە رەت الماتىدان كارگو رەيستەرىمەن جەتكىزىلەدى. سونىڭ ارقاسىندا باسەكەگە قابىلەتتىلىك بار. ال ءبىزدىڭ ونىمگە بۇل جاقتا سۇرانىس جوعارى. اۆستراليالىق قويدان ەش كەم تۇسپەيدى. باستىسى - جاڭا سويىلعان مال ەتى بۇتىندەي ءارى سالقىنداتىلعان كۇيدە تاسىمالدانۋى شارت.
روبەرتو نيكولاس، جەرگىلىكتى مەيرامحانانىڭ باس اسپازى:
- قازاقستاندىق قوي ەتىن الۋدى ءبىر اي بۇرىن باستادىق. سودان بەرى باسقا جەرگە اۋىسقان ەمەسپىز. بۇتىندەي ونشاقتىسىنا بىردەن تاپسىرىس بەرەمىز. كەلۋشىلەر وسى بالعىن ەتتى سۇراپ، ارنايى كەلىپ جاتادى. تۋريستىك ماۋسىم باستالدى، سول سەبەپتى سۇرانىس ۇلعايا بەرەدى دەپ ويلايمىن.
باستامانىڭ وزەگى قازاقستاندىق ءونىمدى امىرلىككە دەلدالسىز جەتكىزۋدە بولىپ وتىر. بۇعان دەيىن ەلدەگى قوي ەتىن نەگىزىنەن ترەيدەرلىك كومپانيالار كوتەرمە باعادا ساتىپ الاتىن. فەرمەرلەرگە ايتارلىقتاي پايدا تۇسپەيتىن. قازىر جان-جاقتى ينتەگراتسيالانعان جۇيە قالىپتاستى. تاقاۋدا عانا دۋبايدا قازاق ساۋدا ءۇيى اشىلىپ، قويما، سەح، تاپسىرىستى قابىلداۋ جانە جەتكىزۋ تولىق قۋاتتا ىسكە قوسىلدى. قازىر قازقستاننان كەلگەن قوي ەتىنىڭ جەرگىلىكتى نارىقتا تانىمال ەكەنىن بىرنەشە جايت اڭعارتىپ تۇر.
حاسان ماليك، مەيرامحانا مەنەدجەرى:
- قازاق مەيرامحاناسى بولعاندىقتان ۇلتتىق تاعامداردى كوپ ازىرلەيمىز. سوعان ساي ونىمدەرىمىزدىڭ قازاقستاننان بولعانى ماڭىزدى. تاپسىرىس ۋاقىتىندا ورىندالادى. ەش ءسوز جوق. وسىنداي قىزمەتتىڭ ىسكە قوسىلعانى قۋانتادى.
ساۋدا ءۇيى وكىلدەرىنىڭ ايتۋىنشا، قوي شارۋاشىلىعىنا كەلگەندە قازاقستاننىڭ مۇمكىندىگى وراسان. جايىلىم كوپ. ءشوبى شۇيگىن ولكەلەردە كوپ قوي ءوسىرىپ، ءتول باسىن كوبەيتسەك، تەك امىرلىك ەمەس، ساۋديا نارىعىن دا وتاندىق ونىممەن قامتۋعا بولادى. ال ارابتار قۇرعاق ءارى ىستىق كليماتتا قوي ەتىنەن باسقانى تۇتىنبايدى. بيىل جارتى جىلدىڭ وزىندە امىرلىككە قازاقستاننان بۇل ءونىمنىڭ 143 مىڭ تونناسى ەكسپورتتالدى.
جالپى ەلدە ەت ءوندىرىسى ارتىپ كەلەدى. بيىلعى 8 ايدا 730 مىڭ تونناعا جۋىق ەت ءوندىرىلىپ، بىلتىرعى جىلدىڭ وسى كەزەڭىمەن سالىستىرعاندا 4,8 پايىز ءوسىم كورسەتتى. ەلەۋلى بولىگى ءىرى قارا مەن قۇسقا تيەسىلى. ياعني قاڭتار-تامىز ارالىعىندا 254603 توننا سيىر، 77829 توننا قوي ەتى دايىندالدى. ال جىلقى ەتى 100 مىڭ تونناعا تاياپ، قۇس ەتىنىڭ كولەمى 250 مىڭ تونناعا جۋىقتادى. سونداي-اق ەكسپورت تا ءوسىپ وتىر. ماسەلەن، سۇرانىس جوعارى سيىر ەتىنە توقتالساق. بيىلعى جارتى جىلدا 12564 ءىرى قارا ەتى ەكسپورتتالسا، 2540 توننا ءونىم سىرتتان اكەلىندى.
24.kz