«ۇلى دالا جورىعى» بيىل پەتروپاۆلداعى ابىلاي حان رەزيدەنتسياسىنان باستالادى
پەتروپاۆل. KAZINFORM - دۇنيەجۇزىلىك كوشپەندىلەر ويىندارى قارساڭىندا وتەتىن «ۇلى دالا جورىعى» بىرەگەي مارافون-بايگەسىنىڭ رەسپۋبليكالىق ىرىكتەۋ كەزەڭىنىڭ باستالۋ كۇنى بەلگىلى بولدى.
«JORYQ» رەسپۋبليكالىق ات سپورتى فەدەراتسياسى باسپا ءسوز قىزمەتىنىڭ مالىمەتىنشە، 11-ناۋرىزدا فەدەراتسيا پرەزيدەنتى باقىتجان تۇرلىبەكوۆ سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆپەن كەزدەستى.
كەزدەسۋ بارىسىندا ۇلتتىق سپورت تۇرلەرى قاۋىمداستىعىنىڭ قولداۋىمەن وتەتىن مارافون-بايگەنىڭ ۇيىمداستىرۋ ماسەلەلەرى تالقىلاندى.
سونداي- اق جيىن بارىسىندا «ۇلى دالا جورىعى» رەسپۋبليكالىق ىرىكتەۋ تۋرىنىڭ وتەتىن ورنى مەن باستالۋ كۇنى دە بەلگىلەندى.
بيىل مارافون-بايگەنىڭ باستالۋ ورنى رەتىندە پەتروپاۆلداعى ابىلاي حان مۋزەي كەشەنى-رەزيدەنتسياسى بەلگىلەنىپ وتىر. جوبا 12-مامىردا باستالىپ، 17-مامىردا استانادا اياقتالادى. بۋراباي كۋرورتتىق ايماعىنىڭ، بوتاي مەن بوزوق كونە مەكەندەرىنىڭ كورىكتى جەرلەرىن باسىپ وتەتىن مارافون-بايگەنىڭ جالپى قاشىقتىعى 500 شاقىرىم بولماق.
ۇزدىك ۇشتىككە ەنگەن جەڭىمپاز كوماندالار قىركۇيەك ايىنا جوسپارلانعان «ۇلى دالا جورىعى» حالىقارالىق تۋرىنا ليتسەنزيا الادى.
قازىرگى تاڭدا وبلىستاردا ايماقتىق ىرىكتەۋ تۋرلارى ءجۇرىپ جاتىر، ولاردىڭ جەڭىمپازدارى ۇلتتىق ىرىكتەۋ تۋرىنا جولداما الادى.
رەسپۋبليكالىق ىرىكتەۋ كەزەڭىندە ورناتىلعان ەڭ ۇزدىك جەتىستىكتەر قازاقستاننىڭ رەكوردتار كىتابىنا (KINES) ەنبەك.
اۆتور
اقەركە داۋرەنبەك قىزى