ۇلى بريتانيالىقتار استانادا وتەتىن كوشپەندىلەر ويىنىنا قاتىسادى

 استانا. KAZINFORM - استانا قالاسىندا 8-14-قىركۇيەك ارالىعىندا وتەتىن V دۇنيەجۇزىلىك كوشپەندىلەر ۇلى بريتانيا ەلى قاتىساتىنىن راستادى.

V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسياسى ءمالىم ەتكەندەي، ۇلى بريتانيا ەلشىلىگىنىڭ قىزمەتكەرلەرى اتالعان ۇيىمنىڭ باسشىلىعىمەن كەزدەسىپ، بريتاندىق سپورتشىلاردىڭ ويىنعا قاتىسۋ تۋرالى ەرەجەلەرمەن تانىسىپ، ءوزارا پىكىر الماستى.

ايتا كەتەيىك، بۇعان دەيىن بريتاندىق وۆاري فەدەراتسياسى وۆاري ۇلتتىق قۇراماسىنىڭ ويىندارعا قاتىساتىنىن رەسمي تۇردە راستاعان بولاتىن. سونداي-اق ۇلى بريتانيا ەلشىلىگىنىڭ وكىلدەرىنە سپورتتىڭ بىرنەشە تۇرىنەن، كۇرەستىڭ بەس تۇرىنەن، Powerful Nomads جانە ارقان تارتىس سياقتى سپورت تۇرلەرىنەن قاتىسۋ مۇمكىندىگىن قاراستىرۋ ۇسىنىلدى.

سونىمەن قاتار بريتاندىق تاراپ كورنەكى سپورت تۇرلەرىنىڭ تىزىمىنە كريكەتتى ەنگىزۋگە، «سپورت عىلىمى» سەكتسياسىندا بريتاندىق سپيكەرلەردىڭ عىلىمي باعدارلاماعا قاتىسۋىنا ءوتىنىم بەردى.

ەستەرىڭىزگە سالا كەتەيىك، دۇنيەجۇزىلىك كوشپەندىلەر ويىنىندا سپورتتىڭ 20 تۇرىنەن كىل مىقتىلار انىقتالادى.

اتاپ ايتساق، اسىق اتۋ، وردو، ارقان تارتىس، بايگە، كوكپار، اۋدارىسپاق، تەڭگە ءىلۋ، قازاق كۇرەسى، الىش، كۋراش، اشىرتمالى ابا گيۋرەشي، سسيرىم، ماس- رەستلينگ، Powerfull nomad (كۇشتىلەردىڭ سايىسى)، توعىزقۇمالاق، مانگالا، وۆاري، ءداستۇرلى ساداق اتۋ، جامبى اتۋ، قۇسبەگىلىكتەن سايىستار وتەدى.

سونداي- اق 10 كورنەكى سپورت سايىسىنان جارىستار وتكىزۋ جوسپارلانعان.

دۇنيەجۇزىلىك كوشپەندىلەر ويىندارى - ەتنيكالىق، ءداستۇرلى سپورت تۇرلەرى بويىنشا وتەتىن حالىقارالىق جارىس. 2014، 2016 جانە 2018 -جىلدارى قىرعىزستاننىڭ شولپان اتا قالاسىندا وتسە، 2022 -جىلى تۇركيانىڭ يزنيك شاھارىندا ءتورتىنشى دۇنيەجۇزىلىك ويىندار ۇيىمداستىرىلدى.

اۆتور

كۇنسۇلتان وتارباي