ۇلى بريتانياداعى قازاقتار لوندوندا باس قوستى
ۇلى بريتانياداعى قازاق دياسپوراسىنا-50 جىل. قىم-قۋىت زاماندا تاعدىردىڭ تالكەگىنە ۇشىراپ، التاي وڭىرلەرىنەن تۇركياعا، ال ودان كەيىن ۇلى بريتانياعا كوشىپ كەتكەن قانداستارىمىز لوندوندا باس قوسىپ، مەرەيلى مەرەكەنى اتاپ ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ءابدىسالىم ساۆاش- ۇلى بريتانيا قازاعى. قانداستارىمىزدىڭ باسىن بىرىكتىرەتىن قاۋىمداستىققا ءتوراعالىق ەتەدى. اتا-اناسى ناۋبەتتى زاماندا التايدان تۇركياعا كوشىپ كەتكەن. ال ءوزى 25 جاسىندا تۇركياداعى ەكونوميكالىق جاعدايدىڭ قيىنداۋىنا بايلانىستى ۇلىبريتانياعا جۇمىس ىزدەپ كەلگەن.
«باستا ءبىز وسى جەردە قالامىز دەپ ويلامادىق. اقشا تاۋىپ، تۇركياعا اكە-شەشەمىزدىڭ جانىنا قالامىز دەگەنبىز. ودان كەيىن بۇل جەردە بالالارىمىز دۇنيەگە كەلدى. ولار ءوستى. وسى جەردىڭ مەكتەبىنە باردى. بالالارىمىزعا توي جاسادىق. نەمەرەلى بولدىق. ەندى بايقاساق، ءبىز ەلگە قايتا المايمىز»،- دەيدى ءادبىسالىم ساۆاش.
ۇلى بريتانيا قازاقتارى الىستا جۇرسە دە، جۇرەگى تۋعان جەر دەپ سوعادى. اتامەكەنىمەن بايلانىسىن ەشقاشان ۇزگەن ەمەس. بۇگىن ولار تۇماندى البيونعا العاش تابان تىرەگەندەرىنە جارتى عاسىرلىق مەرەيتويىن ءسان-سالتاناتىمەن اتاپ ءوتتى.
«بۇگىن ءبىز تاريح قويناۋىنا ۇڭىلدىك. تۇركىستاننان ءۇندىستانعا، پاكىستانعا، ودان كەيىن تۇركياعا كوشكەن جانە اقىر سوڭىندا ەۋروپا ەلدەرىندە تۇراقتاعان اتا-بابامىز تۋرالى وسكەلەڭ ۇرپاققا ايتىپ بەردىك. ۆيكتورينالىق سۇراقتار قويىپ، جەڭىمپازداردى سىيلىقتارمەن ماراپاتتادىق»، - دەيدى قاۋىمداستىق مۇشەسى ومار ساۆاش.
سالت-داستۇرلەرگە بەرىك بولعانىمەن انا تىلىندە سويلەۋگە كەلگەندە جاس بۋىن قينالادى. قازاقشا تۇسىنەدى، ءبىراق ويىن ەركىن جەتكىزە المايدى. ءوزارا تۇرىكشە جانە اعىلشىنشا تۇسىنىسەدى.
«ءتۇرلى تىلدىك كۋرستار ۇيىمداستىرىلعانىمەن ولاردان پايدا از. شەتەلگە تارايتىن قازاق تىلىندەگى تەليەۆيزيالىق ارنالاردى كوبەيتۋ كەرەك. اتا-اناسىمەن ۇيدە وتىرىپ تەلەديدار كورگەن بالا ۇيرەنبەي قويمايدى»، - دەيدى قاۋىمداستىق بەلسەندىلەرى.
«كەيبىر كەزدە ايتادى عوي، ميىن اشىپ قۇيۋ كەرەك دەپ. سول ميىن اشىپ قۇيۋ مەديا ەكەن. قازاق تەلەارنالارى بۇل جاققا كەڭىنەن تاراپ تۇرسا جاقسى بولار ەدى. ءيا، ينتەرنەتتە ءبارى بار دەيدى، ءبىراق جاستار قازىر عالامتورعا باسقا نارسەلەرگە كىرىپ كەتەدى»،- دەيدى قاۋىمداستىق مۇشەسى يسمايل كەسيجي.
قاۋىمداستىق بۇرىن بەيرەسمي بولاتىن. 20 جىل بۇرىن تىركەۋدەن ءوتىپ، سودان بەرى زاڭدى تۇلعا رەتىندە ىس جۇرگىزىپ كەلەدى. وعان 60 قا جۋىق شاڭىراق مۇشەلىك ەتەدى. وتباسىلىق جاعدايىمەن نەمەسە جۇمىس بابىمەن وسىندا ۋاقىتشا تۇرىپ جاتقان قازاقستاندىقتار دا قاۋىمداستىق ۇيىمداستىرعان ءىس-شارالارعا بەلسەندى ارالاسادى. رەسپۋبليكا كۇنىن، ناۋرىز جانە ايت مەرەكەلەرىن بىرگە اتاپ وتەدى.