ۇلى بريتانياداعى ماۋسىمدىق جۇمىسقا بارۋعا 4 مىڭعا جۋىق قازاقستاندىق ءوتىنىش بىلدىرگەن
2023 -جىلدىڭ ءبىرىنشى جارتىجىلدىعىندا 4 مىڭعا جۋىق قازاقستاندىق ۇلى بريتانيا فەرمالارىندا ماۋسىمدىق جۇمىس ىستەۋ ءۇشىن ۆيزا الۋعا ءوتىنىش بەرگەن. سالىستىرۋ ءۇشىن ايتا كەتەيىك، 2019 -جىلى مۇنداي وتىنىشتەر تورتەۋ عانا بولعان، دەپ حابارلايدى قازاقپارات Protenge تەلەگرام كانالىنا سىلتەمە جاساپ.
Tik Tok جەلىسىندە اعىلشىن فەرمالارىندا ماۋسىمدىق جۇمىستاردا قالاي تابىس تابۋعا بولاتىن ۆيدەولار كوبەيدى. ولار اۋىل شارۋاشىلىعى قاجەتتىلىكتەرىنە ماۋسىمدىق جۇمىسشىلاردى تارتاتىن ارنايى باعدارلاما بويىنشا بارادى جانە 2019 -جىلدان باستاپ وعان قازاقستان ازاماتتارى دا قاتىسا الادى.
مۇندا ادامدار ەگىستىكتە 10-12 ساعات كەز كەلگەن اۋا-رايىندا جۇمىس ىستەيدى. ءبىراق سوعان قاراماستان، ۇلى بريتانياعا بارۋعا نيەت بىلدىرگەن قازاقستاندىقتاردىڭ سانى جىل سايىن ارتىپ كەلەدى.
ۇلى بريتانيا ەلشىلىگىنىڭ رەسمي ستاتيستيكاسى بويىنشا ءار جىلدا ۆيزالىق ءوتىنىش بەرگەن قازاقستاندىقتار سانى:
2019 -جىلى - 4 ءوتىنىش؛
2020 -جىلى - 11 ءوتىنىش؛
2021 -جىلى - 402 ءوتىنىش؛
2022 -جىلى - 2711 ءوتىنىش؛
2023 -جىلدىڭ ءبىرىنشى جارتىجىلدىعىندا - 3994 ءوتىنىش.
ايتا كەتەيىك، ۇلى بريتانيادا جالاقىسى تومەن جۇمىسشى ايىنا ميلليون تەڭگەگە جۋىق تابىس تابادى، ال قازاقستاندا ورتاشا جالاقى ءۇش ەسەگە از - 365 مىڭ.
اۆتور
ابىلايحان جۇماشەۆ