ۇلى بريتانيادا ميگرانتتارعا قارسى نارازىلىق ءورشىپ تۇر

استانا. KAZINFORM - يمميگرانتتارعا قارسى نارازىلىقتار، اسىرە وڭشىلدار مەن پوليتسيا قىزمەتكەرلەرىنىڭ اراسىنداعى قاقتىعىستار ۇلى بريتانيادا تىيىلماي تۇر، دەپ حابارلايدى Kazinform ءتىلشىسى.

راديكالدى توپتار يسلام دىنىنە قارسى ۇراندار ايتىپ، مەشىتتەرگە، ميگرانتتار تۇراتىن قوناق ۇيلەرگە شابۋىلدار جاساپ جاتىر. ۇكىمەت باسشىسى مينيسترلەر جانە پوليتسيا وكىلدەرىنىڭ قاتىسۋىمەن شۇعىل كەڭەس وتكىزۋگە ءماجبۇر بولدى.

نارازىلىقتار بي ساباعىنا قاتىسقان ءۇش كىشكەنتاي قىزدىڭ ولىمىنەن كەيىن باستالدى. قىرعىن كەزىندە تاعى ون شاقتى ادام جاراقات الدى. وقيعا انگليانىڭ تەڭىز جاعالاۋىنداعى ساۋتپورت قالاسىندا بولدى.

پوليتسيا قىلمىستىڭ سەبەبىن انىقتاپ جاتىر، ءبىراق ونىڭ تەرروريزممەن بايلانىسى جوق دەپ سانايدى. الەۋمەتتىك جەلىلەردە قىلمىسكەر - راديكالدى مۇسىلمان-ميگرانت دەگەن فەيك تاراپ، تولقۋلاردى ۇدەتتى. پوليتسيا 17 جاستاعى كۇدىكتىنىڭ ۇلى بريتانيادا دۇنيەگە كەلگەنىن حابارلادى.

«الەۋمەتتىك جەلىلەر ارقىلى جالعان اقپارات تاراتىلىپ، قاتىگەزدىكتىڭ كۇشەيۋىنە الىپ كەلدى. پوليتسەيلەرگە كىرپىش لاقتىرۋ، مەشىتتەرگە شابۋىل جاساۋ، دۇكەندەردى توناۋ - بۇل مۇلدەم ماسقارا قىلمىستىق ارەكەت بولىپ ەسەپتەلەدى. كىنالىلەر مىندەتتى تۇردە جازالانادى»، دەدى ۇلى بريتانيا ءى ءى م ءمينيسترى يۆەتت كۋپەر.

ۇلى بريتانيا پرەمەر-ءمينيسترى COBRA توتەنشە جاعدايلارمەن كۇرەس كوميتەتى مۇشەلەرىنىڭ باسىن قوستى. مينيسترلەر، پوليتسيا، بارلاۋ قىزمەتكەرلەرى جانە باسقا دا جاۋاپتى ماماندار داعدارىس جاعدايىندا دەپارتامەنتتەردىڭ شەشىم قابىلداۋىن جانە جۇمىستاردى ۇيلەستىرۋ بارىسىن تالقىلادى.

«ءبىزدىڭ ەلدىڭ حالقى ءقاۋىپسىز ءومىر سۇرۋگە قۇقىلى. دەگەنمەن، مۇسىلمان قاۋىمداستىعى مۇشەلەرىنىڭ قۋدالانعانىن، مەشىتتەرگە شابۋىلدار جاسالعانىن، ناسىلشىلدەردىڭ ماعىناسىز زورلىق-زومبىلىققا بارعانىن كوردىك. مەن بۇل ءۇردىستى اسىرە وڭشىلداردىڭ قاراقشىلىق ارەكەتى دەپ اتايمىن»، دەدى ۇلى بريتانيا پرەمەر-ءمينيسترى كير ستارمەر.

پوليتسيا جاپپاي تارتىپسىزدىكتەرگە اسىرە وڭشىلدار ۇيىمىنىڭ تىكەلەي قاتىسى بار دەپ مالىمدەدى. «انگليا قورعانىس ليگاسىنىڭ» نەگىزىن قالاۋشى توممي روبينسوننىڭ الەۋمەتتىك جەلىلەردە وقىرمانى كوپ. ول ءوزىنىڭ يدەيالارىن تاراتۋ ءۇشىن پلاتفورمالاردى بەلسەندى پايدالانادى. بۇقارالىق اقپارات قۇرالدارىنىڭ تالداۋىنا سايكەس، جەكە ادامدار حالىقتى نارازىلىقتارعا قاتىسۋعا يتەرمەلەپ، وزدەرى تاسادا قالىپ قويىپ ءجۇر.

اۆتور
ەربول جانات