ۇلى بريتانيا يزرايل مينيسترلەرىنە قارسى سانكسيا ەنگىزۋدى قاراستىرىپ جاتىر

استانا. KAZINFORM - سارسەنبى كۇنگى پارلامەنتتىك پىكىرتالاس كەزىندە ۇلى بريتانيا پرەمەر-ءمينيسترى كير ستارمەر ليبەرالدىق-دەموكراتيالىق پارتيانىڭ جەتەكشىسى ەد دەيۆيدىڭ ۇلى بريتانيانىڭ يزرايل مينيسترلەرى بەتسالەل سموتريچ پەن يتامار بەن-گۆيردىڭ مالىمدەمەسىنە قاتىستى ارەكەتى تۋرالى سۇراققا جاۋاپ رەتىندە ونىڭ ۇكىمەتى ولارعا قارسى سانكسيالار ەنگىزۋ «مۇمكىندىگىن قاراستىرىپ جاتقانىن» راستادى.

سموتريچ، اتاپ ايتقاندا، گازا سەكتورىندا 2 ميلليون پالەستينالىقتىڭ اشتىققا ۇشىراۋى «مورالدىق اقتالعان» بولار ەدى دەپ ايتتى، ال بەن-گۆير باتىس جاعالاۋداعى پالەستينالىقتاردى ولتىرگەن يزرايلدىك قونىستانۋشىلاردى «قاھارماندار» دەپ اتادى. بۇل مالىمدەمەلەر حالىقارالىق نارازىلىق تۋدىردى.

«ءبىز مۇنى ارينە، جيىركەنىشتى پىكىرلەر بولعاندىقتان قاراستىرىپ وتىرمىز. باتىس جاعالاۋدا جانە بۇكىل ايماقتاعى باسقا دا الاڭداۋشىلىق تۋدىراتىن ارەكەتتەرمەن قاتار»، - دەدى ستارمەر.

ۇلى بريتانيا پرەمەر-ءمينيسترى سونداي-اق «گازا سەكتورىنداعى گۋمانيتارلىق جاعدايدىڭ اۋىر ەكەنىن» مالىمدەدى.

«يزرايل بەيبىت تۇرعىنداردىڭ قۇربان بولۋىنا جول بەرمەۋ، گازا سەكتورىنا ۇلكەن كولەمدە كومەك كورسەتۋ جانە ب ۇ ۇ-نىڭ گۋمانيتارلىق سەرىكتەستەرىنە ءتيىمدى جۇمىس ىستەۋگە مۇمكىندىك بەرۋ ءۇشىن بارلىق مۇمكىن شارانى قابىلداۋى كەرەك»، - دەپ اتاپ ءوتتى ول.

شىلدەدە سايلانعان ستارمەردىڭ لەيبوريستتىك ۇكىمەتى تاياۋ شىعىستاعى وداقتاسىنىڭ ءوزىن-ءوزى قورعاۋ قۇقىعىن قولداعانىمەن، يزرايلگە قاتىستى ءبىرشاما قاتال پوزيتسيا ۇستاندى.

لوندون يزرايلگە قارۋ-جاراق ەكسپورتتاۋعا ارنالعان كەيبىر ليتسەنزيالاردى شەكتەپ، كەيبىر جابدىقتى حالىقارالىق قۇقىقتى ورەسكەل بۇزۋ ءۇشىن پايدالانۋ قاۋپى بار ەكەنىن مالىمدەدى.

سەيسەنبى كۇنى ۇلى بريتانيا ۇكىمەتى دە يوردان وزەنىنىڭ باتىس جاعالاۋىنداعى پالەستينالىق قاۋىمداستىقتارعا قارسى زورلىق-زومبىلىققا دەمەۋشىلىك جاساعان يزرايلدىك قونىستاندىرۋ ۇيىمدارىنا قارسى جاڭا سانكسيالار جاريالادى.

اۆتور

زارينا تۋعانبايەۆا