ۇلى بريتانيا تۇرمەلەرىندە بوس ورىن قالمادى

ۇلى بريتانيا. KAZINFORM - ۇلى بريتانيادا جاقىندا بيلىككە كەلگەن وپپوزيتسيانىڭ تاعى بەرەكەسى قاشتى. جاڭا ۇكىمەت سوتتالعانداردى قايدا جىبەرەرىن بىلمەي دال، دەپ حابارلايدى Kazinform ءتىلشىسى.

ساناۋلى كۇندەردەن كەيىن تۇرمەلەردە بوس ورىن قالمايىن دەپ تۇر. ياعني، پوليتسيادان باستاپ، سوتقا دەيىنگى قىلمىسقا قارسى كۇرەس ماشيناسىنىڭ ىستەن شىعۋى مۇمكىن. سوندىقتان لەيبوريستەر قىلمىسكەرلەردى كۇزدەن باستاپ، بوستاندىققا جىبەرۋدى جوسپارلاپ وتىر. باسقا امال جوق.

ۇلى بريتانيانىڭ جاڭا ۇكىمەتى تاعى ءبىر كۇردەلى سىناقتان وتۋگە بىلەك سىبانا كىرىستى. بيلىكتەگىلەر قىركۇيەك ايىنان باستاپ جازاسىن وتەۋشىلەردى مەرزىمىنەن بۇرىن بوساتۋ تاجىريبەسىن كەڭەيتۋدى جوسپارلاپ وتىر. ادىلەت ءمينيسترى شابانا ماحمۋدتىڭ ايتۋىنشا، تىعىرىقتان شىعارار باسقا جول جوق.

«تۇرمەلەرىمىزدىڭ تۇگى قالمادى. ايتار ءسوزىم جوق. ەڭ سوراقىسى، بۇرىنعى ۇكىمەت بۇل تۋرالى ءبىلدى. قازىر ەر كىسىلەرگە ارنالعان اباقتىلار 99 پايىزعا دەيىن تولعان. بۇل كورسەتكىش شامامەن سوڭعى 18 اي بويى وسى دەڭگەيدە ساقتالىپ تۇر»، - دەيدى ۇلى بريتانيا ادىلەت ءمينيسترى شابانا ماحمۋد.

ۇكىمەتتىڭ كەيىنگى مالىمەتتەرىنە سايكەس، قازىر سوتتالعانداردىڭ سانى 90 مىڭعا جۋىق جانە بىرنەشە اپتا ىشىندە تۇرمەلەر تۇگەل تولىپ كەتۋى مۇمكىن. ودان كەيىن پوليتسيا بولىمشەلەرىندەگى ۋاقىتشا ۇستاۋ اباقتىلارىن پايدالانۋ قاجەت بولادى. ناتيجەسىندە ءتارتىپ ساقشىلارىنا كوشەلەردى پاترۋلدەۋ قيىنعا تۇسپەك.

«ۇكىمەتتىڭ زاڭعا ۋاقىتشا وزگەرىس ەنگىزۋدەن باسقا امالى جوق ەكەنىن مالىمدەيمىن. جەڭىل جازا تۇرلەرىن وتەۋشىلەر تۇرمەدەن ەرتەرەك شىعارىلادى. شارتتى تۇردە مەرزىمىنەن بۇرىن بوساتۋدىڭ ەڭ تومەنگى شەگى وتەلگەن مەرزىمنىڭ 50 پايىزىنان 40 پايىزىنا دەيىن قىسقارادى»، - دەيدى ۇلى بريتانيا ادىلەت ءمينيسترى شابانا ماحمۋد.

جاڭا ىشكى ىستەر ءمينيسترى دە كۇرمەۋى كوپ ماسەلەنى مۇرا رەتىندە قالدىرىپ كەتكەن كونسەرۆاتورلاردى ايىپتادى. قازىر 6 جاڭا تۇرمەنىڭ قۇرىلىسى ءجۇرىپ جاتىر. قوسىمشا 20 مىڭ ورىندىق اباقتى سالۋ جوسپارلانعان. ويتكەنى ۇكىمەت 20 مىڭ پوليتسەيدى جۇمىسقا الۋعا بەكىنىپ وتىر.

«كونسەرۆاتورلار سوڭعى ايلاردا عانا ەمەس، ءبىراز جىل قاتارىنان جاۋاپكەرشىلىكتەن جۇرداي بولعان. تۇرمەلەردىڭ شامادان تىس تولىپ كەتۋ ماسەلەسىن تەز ارادا شەشۋ مۇمكىن بولمايىن دەپ تۇر»، - دەيدى ۇلىبريتانيا ىشكى ىستەر ءمينيسترى يۆەتت كۋپەر.

جاڭا ۇكىمەتكە مۇنداي قادامعا بارۋ وڭاي بولمادى. جوسپاردىڭ قاۋىپتى ەكەنىن ولار تولىق تۇسىنەدى. ءبىراق اۋرۋىن جاسىرعان ولەدى، دەيدى لەيبوريستەر. بارلىعى 5500-گە جۋىق ادام بوستاندىققا جىبەرىلمەك. قوعام بەلسەندىلەرى دە بيلىك پارتياسىنىڭ بۇل شەشىمىن قولداپ وتىر.

«بۇل دۇرىس شەشىم. ويتكەنى ءبىز ءبىراز ۋاقىتتان بەرى داعدارىستامىز. جانە ودان شىعۋ ءۇشىن ەش ارەكەت جاسالماعانى قىنجىلتادى»، - دەدى تۇرمەلەردى باسقارۋشىلار قاۋىمداستىعىنىڭ پرەزيدەنتى توم ۋيتلي.

ءبىراق ءبىر جارىم جىلدان كەيىن قايتا قارالاتىن جاڭا جوسپارمەن مۇلدەم كەلىسپەيتىندەر دە بار. بوستاندىققا شىققاندار قايتا قىلمىس جاساسا نەمەسە بوساتۋ شارتتارىن بۇزسا، تۇرمەگە قايتا توعىتىلۋى مۇمكىن. ءبىراق وعان قاراماستان قىلمىسكەرلەردىڭ قۇرباندارى وزدەرىن جايسىز سەزىنەتىندەرىن ايتادى.

«قىلمىسكەرلەر تۇرمەدەن ەرتە شىعارىلسا، ولاردان قورلىق كورگەندەردىڭ زارەسى ۇشادى. الاڭداۋشىلىعى ارتىپ، ىشكى جارالارى قوزا تۇسەدى»، - دەدى لوندونداعى جابىرلەنۋشىلەردىڭ قۇقىعىن قورعاۋ بويىنشا كوميسسار كلەر ۆاكسمان.

ۇلى بريتانيا جازاسىن وتەۋشىلەردىڭ سانى بويىنشا باتىس ەۋروپادا كوش باستاپ تۇر. پاندەميادان كەيىن ولاردىڭ سانى ءتىپتى ارتقان. ويتكەنى سوت وتىرىستارىنىڭ كەشىگۋى جيىلەپ، قاماۋدا ۇستاۋ مەرزىمى ۇزارعان. سونداي-اق اۋىر قىلمىس جاساعاندارعا جازاسىنىڭ كەم دەگەندە 65 پايىزىن وتەۋ تالابى كۇشەيگەن. ساراپشىلار دا، بيلىك وكىلدەرى دە قۇقىق بۇزۋشىلىقتىڭ الدىن الۋ شارالارىن كۇشەيتۋدى جانە تۇرمەگە توعىتۋدىڭ ورنىنا بالاما رەتىندە شارتتى جازالار ەنگىزىپ، ماجبۇرلەۋ جۇمىستارىن قولدانۋ تاجىريبەسىن كەڭەيتۋدى ۇسىنىپ وتىر.

اۆتور

عالىمجان قارامان ۇلى