ۇلى بريتانيا سوتىندا قىتايلىق «عاسىر الاياعى» ءوز كىناسىن مويىندادى

استانا. KAZINFORM - ۇلى بريتانيادا بيتكويندەردى جىلىستادى دەگەن كۇدىككە ىلىنگەن 47 جاستاعى قىتايلىق جيمين چيان تاريحتاعى ەڭ ءىرى الاياقتىق تەرگەۋىنىڭ بولىگى اياسىندا ءوز كىناسىن مويىندادى، دەپ حابارلايدى Euronews.

تەرگەۋ مالىمەتىنشە، جيمين چيان 2014-2017 -جىلدارى قىتايدا ءىرى كولەمدەگى الاياقتىق ۇيىمداستىرىپ، ءوزىنىڭ Tianjin Lantian Gerui Electronic Technology كومپانياسىنىڭ 128 مىڭنان استام سالىمشىسىن الداعان. ول جابىرلەنۋشىلەرگە تابىستىڭ 00 ىن قايتارۋعا ۋادە بەرىپ، ۇرلانعان قاراجاتتى بيتكوينگە اينالدىردى.

سودان كەيىن چيان ەلدەن كەتىپ، ۇلى بريتانياعا كىردى، ول جەردەن تاڭداۋلى جىلجىمايتىن مۇلىك ساتىپ الدى.

بريتان پوليتسياسى ايەلدەن شامامەن 7 ميلليارد دوللار كولەمىندە رەكوردتىق كريپتوۆاليۋتانى تاركىلەدى. بۇل - الەمدەگى ەڭ ءىرى تاركىلەۋ وقيعالارىنىڭ ءبىرى.

چياننىڭ كىناسىن مويىنداۋى بريتاندىق قۇقىق قورعاۋشىلاردىڭ قىتايلىق ارىپتەستەرىمەن بىرلەسىپ جۇرگىزگەن اقشانى جىلىستاتۋدىڭ جاھاندىق سحەماسىنا قاتىستى جەتى جىلعا جۋىق تەرگەۋدى اياقتادى.

وتكەن جىلى ونىڭ سىبايلاسى وسى ءىس بويىنشا التى جىلعا باس بوستاندىعىنان ايىرىلدى، ال چياننىڭ وزىنە ۇكىم جاقىن ارادا شىعارىلادى.

تەرگەۋ انىقتاعانداي، چيان ءوزىنىڭ جەكە كۇندەلىگىندە «قۇداي انا» جانە «حانشايىم» بولۋدى ارمانداعانىن جازعان.

بۇل اتىشۋلى ىسكە دەگەن قىزىعۋشىلىق الاياقتان تاركىلەنگەن قارجىنىڭ بولاشاعىنا قاتىستى داۋ-دامايدان تۋىنداپ وتىر. ۇلى بريتانيا تاركىلەنگەن اكتيۆتەردى بيۋدجەت تاپشىلىعىن جابۋ ءۇشىن قالدىرۋدى كوزدەسە، كوپتەگەن قىتايلىق جابىرلەنۋشىلەر اقشالارىن قايتارۋدى تالاپ ەتىپ وتىر.  

بۇعان دەيىن ق ح ر بۇرىنعى اۋىل شارۋاشىلىعى ءمينيسترى تان جەنجيان اسا ءىرى كولەمدە پارا العانى ءۇشىن ءولىم جازاسىنا كەسىلگەنىن جازعان بولاتىنبىز.