ۇلى بريتانيا قازاقستاندىق ستۋدەنتتەر ءۇشىن Chevening ستيپەندياسىن قارجىلاندىرۋدى 2 ەسەگە ارتتىرادى
استانا. KAZINFORM - سوڭعى 11 جىلدا قازاقستان مەن ۇلى بريتانيا ەكىجاقتى قارىم- قاتىناستاردى دامىتۋدا جارقىن جەتىستىكتەرگە قول جەتكىزدى.
بۇل تۋرالى ۇلى بريتانيانىڭ سىرتقى ىستەر ءمينيسترى دەۆيد كەمەروننىڭ ق ر سىرتقى ىستەر ءمينيسترى مۇرات نۇرتىلەۋمەن بولعان كەزدەسۋىندە ايتىلدى.
ۇلى بريتانيا س ءى م باسشىسى ەكى ەلدىڭ ديپلوماتيالىق قاتىناستارى 16-عاسىردان باستاۋ الاتىنىن اتاپ ءوتتى.
«2013 -جىلدان باستاپ مەن قازاقستانعا كەلىپ ءجۇرمىن. وسى ۋاقىتقا دەيىن قازاقستان وراسان زور جەتىستىككە قول جەتكىزدى. مەن بۇل پروگرەستىڭ كۋاسى بولدىم. ءبىز ستراتەگيالىق ديالوگتى بىرنەشە جىل بۇرىن باستاعان ەدىك. ال، بۇگىن ءبىز ستراتەگيالىق سەرىكتەستىك پەن ىنتىماقتاستىق تۋرالى كەلىسىمگە قول قويدىق. بۇل - ءبىزدىڭ ىنتىماقتاستىعىمىزدىڭ بارلىق سالالارىن قامتيتىن قۇجات. سوڭعى 11 جىلدا ءبىز ەكىجاقتى قارىم-قاتىناستارىمىزدى دامىتۋدا ۇلكەن جەتىستىكتەرگە جەتتىك. قازاقستاندا ءبىلىم بەرۋ مەكەمەلەرى قۇرىلدى»، - دەدى دەۆيد كەمەرون.
ول ۇلى بريتانيادا ءبىلىم الۋ ءۇشىن قازاقستاندىق ستۋدەنتتەرگە ارنالعان Chevening ستيپەندياسىنىڭ بيۋدجەتى ارتىپ، قارجىلاندىرۋدى ەكى ەسەگە ارتتىرۋدى جوسپارلاپ وتىرعانىن مالىمدەدى.
وسىعان دەيىن قازاقستان مەن ۇلى بريتانيا سىرتقى ساياسي ۆەدومستۆولارى باسشىلارىنىڭ كەلىسسوزدەر ءجۇرىپ جاتقانىن جازعان ەدىك.
ورالحان قوجانوۆ