سولتۇستىك-باتىس تسيكلونى مەن وعان بايلانىستى اتموسفەرالىق فرونتتاردىڭ وتۋىنە بايلانىستى رەسپۋبليكانىڭ باتىسىندا، سولتۇستىگىندە، ورتالىعىندا جانە شىعىسىندا اۋا رايى قۇبىلمالى بولادى. جاڭبىر جاۋىپ، نايزاعاي وينايدى، 16-17 شىلدەدە كەيبىر اۋدانداردا نوسەر جاڭبىر كۇتىلەدى. بۇرشاق جاۋۋى، داۋىلدى جەلدىڭ كۇشەيۋى مۇمكىن.
جاۋىن-شاشىننىڭ اسەرىنەن ەلىمىزدىڭ باتىسىندا اپتاپ ىستىق بىرتىندەپ باسەڭدەيدى: كۇندىز اۋا تەمپەراتۋراسى 22… 35°C، سولتۇستىكتە قىسقا مەرزىمدى تومەندەۋ بايقالىپ، 21… 36°C بولادى. ال رەسپۋبليكانىڭ ورتالىعى مەن شىعىسىندا وتە قاتتى ىستىق ساقتالىپ، اۋا تەمپەراتۋراسى 41°C- قا دەيىن كوتەرىلەدى.
سونىمەن قاتار رەسپۋبليكانىڭ وڭتۇستىگىندە، وڭتۇستىك-شىعىسىندا جانە وڭتۇستىك-باتىسىنىڭ جەكەلەگەن اۋداندارىندا ورتا ازيا وڭىرلەرىنەن كەلەتىن ىستىق اۋا ماسسالارىنىڭ ىقپالى ساقتالادى. بۇل وڭىرلەردە جاۋىن-شاشىنسىز اۋا رايى كۇتىلەدى، تەك وڭتۇستىك-شىعىستىڭ تاۋلى ايماقتارىندا عانا وتكىنشى جاڭبىر جاۋىپ، نايزاعاي بولۋى مۇمكىن. كۇندىز اۋا تەمپەراتۋراسى 41… 46°C- قا دەيىن جەتىپ، كليماتتىق نورمادان جوعارى بولادى.