لوندوندا ديزەل وتىنىنىڭ ورتاشا باعاسى ليترىنە 1,82 فۋنت ستەرلينگكە دەيىن (1150 تەڭگە) كوتەرىلدى.
Aikyn.kz الەمنىڭ ەڭ قىمبات قالاسىنىڭ ءبىرى لوندوندا جانارماي باعاسىنىڭ ءوسۋىن Telegraph باسىلىمىنىڭ حابارلاماسىنا سۇيەنىپ تالدايدى.
ساراپشىلاردىڭ ايتۋىنشا، مۇناي باعاسى تومەندەي باستاعانىمەن، بۇل وزگەرىس ازىرگە جانارماي قۇيۋ بەكەتتەرىندەگى باعالارعا اسەر ەتپەگەن. RAC اۆتوكلۋبىنىڭ مالىمەتىنشە، ديزەل وتىنىنىڭ ورتاشا باعاسى ليترىنە 1,82 فۋنت ستەرلينگكە دەيىن (1150 تەڭگە) كوتەرىلىپ، ءبىر ايدا 10 پايىزعا قىمباتتاعان. اقپان ايىنىڭ سوڭىنان بەرى ديزەل باعاسى 27 پايىزعا وسكەن. ال بەنزين باعاسى ليترىنە 1,62 فۋنت ستەرلينگكە (1023 تەڭگە) جەتىپ، تولىق جانارماي قۇيۋ قۇنى شامامەن 89 فۋنت بولعان (56200 تەڭگە). بۇل كورسەتكىش ءبىر ايدا 7 پايىزعا، ال سوعىس باستالعالى بەرى شامامەن 22 پايىزعا ارتقان.
RAC ۇيىمىنىڭ ساياسات جونىندەگى جەتەكشىسى سايمون ۋيليامستىڭ ايتۋىنشا، سوڭعى اپتالاردا جانارماي باعاسى يرانداعى سوعىس باستالعاننان بەرگى ەڭ جوعارى دەڭگەيگە جەتكەن. ونىڭ ايتۋىنشا، مۇنايدىڭ الەمدىك باعاسى ارزانداپ كەلە جاتقاندىقتان، الداعى ۋاقىتتا جانارماي باعاسىنىڭ ءوسۋى توقتاپ، بىرتىندەپ تومەندەيدى دەپ بولجانۋدا.
قازىرگى ۋاقىتتا Brent ماركالى مۇناي باعاسى باررەلىنە 80,6 دوللارعا دەيىن تومەندەگەن. بۇل كوكتەمدەگى 114 دوللارلىق ەڭ جوعارى دەڭگەيدەن شامامەن 30 پايىزعا تومەن. ساراپشىلاردىڭ پىكىرىنشە، ا ق ش پەن يران اراسىنداعى ىقتيمال بەيبىت كەلىسىمگە قاتىستى قايتا ويانعان ءۇمىت، پرەزيدەنت ترامپتىڭ جۇمساق مالىمدەمەلەرى مۇناي نارىعىنا وڭ ىقپال ەتىپ وتىر.
ۇلى بريتانيانىڭ ەنەرگەتيكا ءمينيسترى ميەتتا فانبۋللەح ۇكىمەتتىڭ جانارماي باعاسىن ءجىتى باقىلاپ وتىرعانىن ايتىپ، قازىرگى باعالار حالىققا ۇلكەن سالماق تۇسىرگەنىن مويىنداعان. RAC ساراپشىلارى بولشەك ساۋداداعى «راكەتا مەن قاۋىرسىن» قۇبىلىسىنا نازار اۋدارادى. بۇل جاعدايدا مۇناي قىمباتتاعاندا جانارماي باعاسى بىردەن وسەدى، ال مۇناي ارزانداعاندا بولشەك باعالار وتە باياۋ تومەندەيدى.
جانارمايدىڭ قىمباتتاۋى ۇلى بريتانيا ۇكىمەتىنە دە قىسىمدى كۇشەيتتى. ساراپشىلار جانارماي اكتسيزىن كوتەرۋ جوسپارى كەيىنگە قالدىرىلۋى ىقتيمال ەكەنىن ايتادى. بۇعان دەيىن ءومىر ءسۇرۋ قۇنىنىڭ وسۋىنە بايلانىستى ۇكىمەت اكتسيز مولشەرلەمەسىن كوتەرۋدى ۋاقىتشا شەگەرگەن بولاتىن.
قازاق ەلى ءۇشىن دە بۇل ماڭىزى ماسەلە. قازاق ەلىندە دە جانارماي باعاسىنا الەمدىك مۇناي نارىعىنداعى وزگەرىستەر اسەر ەتەدى. ەگەر تاياۋ شىعىستاعى گەوساياسي تۇراقسىزدىق ساقتالسا، بۇل حالىقارالىق لوگيستيكا مەن مۇناي باعاسىنىڭ قۇبىلۋىنا ىقپال ەتىپ، ىشكى نارىقتاعى جانارماي قۇنىنا دا قىسىم تۇسىرەدى. مۇناي باعاسىنىڭ تومەندەۋى ەكسپورتتىق كىرىستەردىڭ ازايۋىنا دا اسەر ەتەتىنى بەلگىلى.