لوندوندا ۇشۋ جولاعىنان شىعىپ كەتكەن ۇشاق باتپاققا باتىپ قالدى

استانا. KAZINFORM - لوندونداعى حيتروۋ اۋەجايىندا لاگوسقا (نيگەريا) BA75 رەيسىمەن ۇشۋعا دايىندالعان Boeing 787 Dreamliner ۇشاعى جولاقتان شىعىپ كەتكەن.

Фото: x.com/richardcoops

لاينەردىڭ الدىڭعى دوڭگەلەگى اسفالتتان شىعىپ، ءشوپتى جەرگە باتىپ قالعان، دەپ حابارلايدى Massaget.kz.

The Sun باسىلىمىنىڭ مالىمەتىنشە، وقيعا تاڭعى ساعات 10:40 شاماسىندا بولعان. الدىن الا بولجام بويىنشا، بۇعان ۇشقىشتىڭ قاتەلىگى سەبەپ بولۋى مۇمكىن.

«تاڭعالارلىعى، ۇشاق ۇشۋ جولاعىنان شىعىپ، ءشوپتى جيەككە ءتۇسىپ كەتكەنگە ۇقسايدى. بۇعان ۇشقىشتىڭ قاراپايىم قاتەلىگىنەن باسقا نە سەبەپ بولۋى مۇمكىن ەكەنىن ءتۇسىنۋ قيىن»، - دەيدى وقيعا كۋاگەرلەرىنىڭ ءبىرى.

ۇشاق بورتىندا 215 جولاۋشى بولعان. وقيعادان كەيىن رەيس توقتاتىلدى.

الەۋمەتتىك جەلىلەردە وقيعا ورنىنان تۇسىرىلگەن ۆيدەولار تارادى. كادرلاردا ۇشاققا جەدەل قىزمەتتەردىڭ كەلگەنى كورىنەدى. ماماندار ءشوپتى جەرگە باتىپ قالعان دوڭگەلەكتى شىعارۋعا كىرىسكەن.

ب ا ق مالىمەتىنشە، وقيعا اۋەجاي جۇمىسىنا دا كەدەرگى كەلتىرگەن.

British Airways اۋەكومپانياسى رەيستىڭ توقتاتىلعانى ءۇشىن جولاۋشىلاردان كەشىرىم سۇرادى. لوندوننان لاگوسقا ۇشۋ ۋاقىتى 6 ساعات 45 مينۋت بولۋى ءتيىس ەدى.

وقيعا كەزىندە ۇشاق ۇشۋعا تولىق دايىن بولعان جانە تۇراقتان ۇشۋ-قونۋ جولاعىنا قاراي قوزعالا باستاعان.

«ءبىزدىڭ قىزمەتكەرلەر جولاۋشىلاردى دىتتەگەن جەرىنە مۇمكىندىگىنشە تەز جەتكىزۋ ءۇشىن جۇمىس ىستەپ جاتىر. ولار جولاۋشىلارمەن بايلانىستا بولىپ، تۋىنداعان ماسەلەلەردى شەشۋگە كومەكتەسۋدە»، - دەپ مالىمدەدى اۋەكومپانيا.