ەلوردانىڭ دەنساۋلىق ساقتاۋ باسقارماسى قىزىلشاعا بايلانىستى مالىمدەمە جاسادى

ەلوردادا قىزىلشا اۋرۋى دەندەپ بارادى. №3-كوپبەيىندى قالالىق بالالار اۋرۋحاناسىنىڭ ينفەكسيالىق ستاتسيونارىندا 200 گە جۋىق بالا قىزىلشادان ەم الىپ جاتىر، ونىڭ باسىم بولىگى - ۋاقىتىلى ەكپە الماعاندار، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.

اۋرۋحادا جاتقان انالار اراسىندا ەكپە الۋدىڭ ماڭىزدىلىعىن تۇسىنگەندەر كوپ. بالالارىنا ۋاقىتىلى ەكپە سالدىرماعان انالار مەن دەر كەزىندە ۆاكسينا جاساتقان انالار ويلارىمەن ءبولىستى.

«بالامنىڭ 5 كۇن بويى قىزۋى كوتەرىلدى. دەنساۋلىعى جاقسارماي جاتقانىن كورىپ، جەدەل مەديتسينالىق جاردەم شاقىردىق. بالام سويلەي الماي، تۇرا الماي قاتتى اۋىرعان ەدى. ەگەر دە ەكپە السام، بۇل جاعداي بولماۋشى ما ەدى دەپ ويلايمىن. ۆاكسينا سالدىرعان ۇلكەن بالام جەڭىل تۇردە اۋىرىپ، تەز ساۋىعىپ شىقتى. ەندى الداعى ۋاقىتتا قىزىلشا اۋرۋىنان ەكپەنى الدىن الا مىندەتتى تۇردە الامىن»، - دەدى داريعا وتەشوۆا.

قازىرگى تاڭدا، قوعامدىق دەنساۋلىق ساقتاۋ باسقارماسىمەن قىزىلشا اۋرۋىنىڭ الدىن الۋ، ەمدەۋ جانە يممۋنداۋ بويىنشا ءتيىستى جۇمىس جۇرگىزىلىپ جاتىر.

جالپى، قابىلداۋ بولمەسىندە دارىگەرلەردى قابىلداۋدىڭ 8 بەكەتى، ونىڭ ىشىندە قىزىلشا بويىنشا قابىلداۋ بولمەسىندە 2 بەكەت ۇيىمداستىرىلدى. تاۋەكەل توبىنداعى بالالارعا (Triage - جۇيەسى بويىنشا قىزىل ءتۇس) كەزەكتەن تىس قىزمەت كورسەتىلەدى. سونداي-اق ءاربىر ينفەكسيالىق بولىمشەدە قوسىمشا ورتا مەديتسينالىق پەرسونالدىڭ تاعى ءبىر بەكەتى ورنالاستىرىلدى.

ەسكە سالايىق، ەلوردادا 6 ايدان باستاپ، 10 اي 29 كۇنگە دەيىنگى سابيلەردى جاپپاي ۆاكسيناتسيالاۋ ءجۇرىپ جاتىر. ولارعا جەلتوقسان ايىنان باستاپ، 2-4 جاس ارالىعىنداعى بالالار قوسىلادى.

«ناۋقاسپەن بايلانىس بولعان جاعدايدا، قوسىمشا ەكپە الۋ ءۇشىن كەز كەلگەن تۇرعىن تۇرعىلىقتى مەكەنجايى بويىنشا ەمحاناعا جۇگىنۋى كەرەك ەكەنىن ەسكە سالامىز. ءوزىڭىزدى جانە جاقىندارىڭىزدىڭ دەنساۋلىعىن ساقتاڭىز!»، - دەلىنگەن قوعامدىق دەنساۋلىق ساقتاۋ باسقارماسى تاراتقان حابارلامادا.

 

اۆتور
ابىلايحان جۇماشەۆ