ەلوردالىق ەرىكتىلەر انالار مەن قىز-كەلىنشەكتەرگە قۋانىش سىيلاپ ءجۇر
استانا. KAZINFORM - «استانا جاستارى» جاستار رەسۋرستىق ورتالىعىنىڭ ەرىكتىلەرى حالىقارالىق ايەلدەر كۇنى مەرەكەسى قارساڭىندا ەلوردا تۇرعىندارىن قۇتتىقتاپ، گۇلدەرمەن جانە شوكالادتارمەن قۋانتىپ جاتىر.
بۇل تۋرالى ەلوردا اكىمدىگىنىڭ رەسمي سايتى جازدى.
ەرىكتىلەر گۇل شوقتارى مەن شوكالادتى قالانىڭ تۇرعىندار تىعىز قونىستانعان جەرلەرىندە ايەل ادامدارعا سىيلاپ جاتىر. اكتسيا جىل سايىن وتكىزىلەدى.
«ءبىزدىڭ ماقساتىمىز - نازىك جاندىلارعا مەرەكەلىك كوڭىل كۇي سىيلاۋ. قىمباتتى حانىمدارعا باقىت، دەنساۋلىق جانە اماندىق تىلەيمىن»، - دەدى ەرىكتىلەردىڭ ءبىرى ەراسىل امانتاي.
استانالىقتار ءوز كەزەگىندە كورسەتىلگەن قۇرمەتكە ريزا بولىپ، جاستاردىڭ نيەتىنە العىس ءبىلدىردى.
«بارلىعىنا كوپ راقمەت! كۇتپەگەن جەردەن كوڭىل كۇي بىردەن كوتەرىلدى. ءاربىر ايەلگە زور باقىت تىلەيمىن!» - دەدى اينۇر سمايىلوۆا.
اكسيا ءالى دە جالعاسىپ جاتىر. ەرىكتىلەر استانالىق انالار مەن ارۋلارعا 1000 نان اسا گۇل مەن شوكالاد سىيلايدى.