ەلورداداعى تۇران داڭعىلى نەلىكتەن جانە قانشا ۋاقىتقا جابىلدى

استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا ماگيسترالدى كارىز كوللەكتورىنىڭ قۇرىلىسى ءجۇرىپ جاتقانىن جەتكىزدى.

«وزدەرىڭىز بىلەتىندەي، 21-اقپاننان باستاپ تۇران داڭعىلىنداعى (ورىنبور مەن باعلانوۆا كوشەلەرىنىڭ اراسى) ۋچاسكەنىڭ ءبىر بولىگىن ۋاقىتشا جاپتىق. قازىر مۇندا ماگيسترالدى كارىز كوللەكتورىنىڭ قۇرىلىسى بويىنشا جۇمىس ءجۇرىپ جاتىر. بۇل نىساننىڭ قالاعا قانشالىقتى ماڭىزدى ەكەنىن قىسقاشا ايتىپ وتەيىن. قازىرگى ۋاقىتتا قالانىڭ سول جاعالاۋ بولىگىنىڭ شارۋاشىلىق- تۇرمىستىق سۋى ماڭگىلىك ەل داڭعىلى، كەرەي جانىبەك حاندار كوشەسى جانە تۇران داڭعىلى ارقىلى وتەتىن ماگيسترالدى كوللەكتوردىڭ كومەگىمەن اعىزىلادى. كوللەكتور 16 جىل بۇرىن سالىنعان. ونىڭ ۇزىندىعى - 6 ك م» ، - دەپ اتاپ ءوتى اكىم.

جەڭىس قاسىمبەكتىڭ ايتۋىنشا، قالانىڭ قارىشتاپ دامىپ، اعىندى سۋدىڭ كولەمى ۇلعايعان. ال كوللەكتور ءوز مۇمكىندىگىنىڭ شەگىندە عانا جۇمىس ىستەيدى.

كوللەكتورعا تۇسەتىن جۇكتەمەنىڭ ارتۋىنا بايلانىستى ونىڭ جۇمىسىندا ىركىلىستەر بولادى، ال اۆاريالىق- قالپىنا كەلتىرۋ جۇمىسى كۇتكەن ناتيجەنى بەرمەي وتىر.

ەلوردانىڭ ءدال وسى اۋدانىندا اعىندى سۋدى اعىزۋدىڭ وزگە جولى جوق.

ال قولدانىستاعى قۇبىردى ودان ءارى پايدالانۋدىڭ سالدارىنان اعىندى سۋ جەر بەتىنە كوتەرىلىپ، ءبىرقاتار كوشەنى باسىپ قالۋى مۇمكىن.

سول سياقتى تەحنوگەندىك، ەكولوگيالىق سيپاتتاعى جاعىمسىز سالدارعا اكەلۋى مۇمكىن.

«شارۋاشىلىق- تۇرمىستىق سۋدى اعىزۋ ءۇشىن ارنايى جوبا ازىرلەدىك جانە وسى ايدا تۇران داڭعىلىنداعى ماگيسترالدى كارىز كوللەكتورىنىڭ قۇرىلىسىن باستادىق. ونىڭ ۇزىندىعى - شامامەن 8 ك م. اياقتالۋ مەرزىمى - 9 ناۋرىز. قۇرىلىس قارقىنىن جىلدامداتۋدى جانە مەرزىمىنەن بۇرىن جول قوزعالىسىن قامتاماسىز ەتۋدى تاپسىردىم»، - دەپ جازادى جەڭىس قاسىمبەك.