ەلورداداعى «نۇر الەم» سفەراسىندا الەم AI حالىقارالىق جاساندى ينتەللەكت ورتالىعى اشىلادى

استانا. KAZINFORM - ەلورداداعى ەكسپو قالاشىعىنداعى «نۇر الەم» سفەراسىندا الەم AI حالىقارالىق جاساندى ينتەللەكت ورتالىعى اشىلادى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ايتتى.

- مەملەكەت باسشىسىنىڭ يدەياسى بويىنشا ەكسپو قالاشىعىنىڭ مارجانى - سفەرا- پاۆيلونى بازاسىندا الەم  AI حالىقارالىق جاساندى ينتەللەكت ورتالىعى پايدا بولادى. قازىرگى ۋاقىتتا شاردىڭ ءىشىن تولىقتاي جاڭارتىپ جاتىرمىز. ەكسپوناتتاردى ءبارى شىعارىلىپ، تاقىرىپتارى بويىنشا مۋزەيلەرگە ءبولىنىپ بەرىلدى، - دەدى مينيستر پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، سفەرا-پاۆيلون 8 قاباتتان تۇرادى. ونىڭ ءبىرىنشى قاباتى قوعامدىق كەڭىستىك بولادى. وندا AI  مۋزەي، AI  كينوتەاتر، بالالارعا AI ايماق، جاساندى ينتەللەكت سالاسىنا ارنالعان AT- كەڭىستىك ورنالاسادى.

2 -جانە 3-قاباتتا IT ماماندىعىنىڭ 11 باعىتى بويىنشا 12 مەن 18 جاستاعى بالالارعا ءبىلىم بەرەتىن TUMO Education باعدارلاماسى قولعا الىنادى.

-  4 - جانە 5 - ەتاج Tomorrow School بولادى. بۇل - وڭىردەگى ءبىرىنشى جاساندى ينتەللەكت مەكتەبى. 100 ورىنعا شاقتالعان بۇل مەكتەپتى Astana Hub تا ىسكە قوستىق. ءۇش رەت ىرىكتەۋ جۇرگىزدىك. ءار ىرىكتەۋگە 3500 دەن استام ءوتىنىم ءتۇستى. ياعني، قىزىعۋشىلىق وتە ۇلكەن. باعدارلاما 18 دەن 24 ايعا دەيىن سوزىلادى. بۇل باعدارلامانىڭ ەرەكشەلىگى - وقىتۋشى جوق، ستۋدەنتتەر ءبىر- بىرىنەن ۇيرەنەدى. ستۋدەنتتەر جاسى 18 دەن 45 جاسقا دەيىن. اپتاسىنا تاۋلىك بويى اشىق بولادى، تەگىن. ونى وڭىرلەردە دە تاراتامىز. قازاقستان بويىنشا 6-7 مەكتەپ اشامىز، - دەدى جاسلان ماديەۆ.

ءمينيستردىڭ ايتۋىنشا، 6-قاباتتا ستارتاپتارعا ارنالعان AI- كامپۋس، ال 7-قاباتتا RD- كەڭسەلەر مەن Big Tech كومپانيالاردىڭ AI- زەرتحانالارى بولادى. قازىردىڭ وزىندە Google كومپانياسىمەن الدىن الا كەلىسىم بار. ولار Google Engineering Training Center اشادى. مۇنان بولەك، وزگە دە ءىرى كومپانيالاردىڭ كەڭسەلەرى مەن زەرتحانالارى ورنالاستىرىلادى.

- 8-قاباتتا AI- مەملەكەت - AI-driven government بولادى. وندا ەكونوميكا سەكتورلارىنا جاساندى ينتەللەكتىنى ەنگىزۋ ءۇشىن مەملەكەت، عىلىم جانە بيزنەس كوللابوراتسياسى جۇزەگە اسىرىلادى، - دەدى جاسلان ماديەۆ.

بۇعان دەيىن ەلورداداعى EXPO قالاشىعى سيفرلىق دامۋ مينيسترلىگىنىڭ قاراماعىنا وتەتىنىن جازعان ەدىك