ەلورداداعى مەديتسينالىق ورتالىق قاتەرلى ىسىكتى انىقتايتىن پرەپارات شىعارا باستادى
پرەزيدەنت ءىس باسقارماسىنىڭ مەديتسينالىق ورتالىعىنىڭ اۋرۋحاناسى ميداعى قاتەرلى ىسىكتى ەرتە انىقتاۋعا كومەكتەسەتىن پرەپارات شىعارۋ جوباسىن ءساتتى ىسكە اسىردى، دەپ حابارلايدى Kazinform.
بۇل تۋرالى پرەزيدەنت ءىس باسقارۋشىسى ايبەك دادەبايەۆ رەسمي Telegram-ارناسىندا جازعان.
«پرەزيدەنت ءىس باسقارماسىنىڭ مەديتسينالىق ورتالىعى اۋرۋحاناسىنىڭ ماڭىزدى جاڭالىعى بار. كلينيكانىڭ جانىنداعى يادرولىق مەديتسينالىق ورتالىق ماماندارى 11س- مەتيونين راديوفارماتسيەۆتيكالىق پرەپاراتىن شىعارۋ جوباسىن ءساتتى جۇزەگە اسىردى. توموگرافيانى 11C- مەتيونيندى پايدالانۋ ميداعى قاتەرلى ىسىكتى ەرتە دياگنوستيكالاۋعا مۇمكىندىك بەرەدى، ول ىسىك كولەمىن انىقتاۋدا «التىن ستاندارت» رەتىندە مويىندالعان»، - دەپ جازدى ول.
ايبەك دادەبايەۆ اتالمىش مەكەمە بۇعان دەيىن سيكلوتروندى كەشەندە ەكى راديوفارماتسيەۆتيكالىق پرەپارات وندىرە باستاعانىن اتاپ وتكەن.
«دارىگەرلەر ايتقانداي، الەمدىك تاجىريبەدە اۋرۋحانالار جىل سايىن ءبىر نەمەسە ەكى پرەپارات قانا شىعاراتىنىن ەسكەرسەك، بۇل ءبىزدىڭ اۋرۋحانا ءۇشىن ۇلكەن جەتىستىك. وسىلايشا، قاتەرلى ىسىك اۋرۋلارىن ەرتە باستان تابۋ مەن ەمدەۋ باعىتىندا ۇلكەن ناتيجەگە قول جەتىپ وتىر»، - دەيدى ايبەك دادەبايەۆ.
ونىڭ مالىمەتىنشە، بۇگىنگە دەيىن يادرولىق مەديتسينالىق ورتالىقتا 4 مىڭعا تارتا ادام دياگنوستيكادان وتكەن.