ەلورداداعى جەتەكشى جوعارى وقۋ ورىندارىنىڭ ستۋدەنتتەرى اسكەري انت قابىلدادى
استانا. KAZINFORM - استانادا جوعارى وقۋ ورىندارى جانىنداعى اسكەري كافەدرالاردىڭ ءۇش جۇزدەن استام تۇلەگى وتانىنا ادال بولۋعا انت بەردى.
ءىس-شارا «وتان انا» مونۋمەنتىنە گۇل شوقتارىن قويۋدان باستالدى. قۇرمەتتى قوناقتار، جوعارى وقۋ ورىندارىنىڭ باسشىلارى مەن وقىتۋشىلارى، ستۋدەنتتەر، قارۋلى كۇشتەردىڭ ارداگەرلەرى قازاقستاندىق جاۋىنگەرلەردى ءبىر مينۋت ۇنسىزدىكپەن ەسكە الدى.
قۇرمەتتى قوناقتار حالىق قاھارمانى گەنەرال-لەيتەنانت باقىتجان ەرتايەۆ پەن گەنەرال-لەيتەنانت اباي تاسبولاتوۆ كافەدرا تۇلەكتەرىنە ماماندىق يگەرۋدە جانە ءوز مانسابىن قۇرۋدا تابىس تىلەدى.
ءراسىم قازاقستان رەسپۋبليكاسىنىڭ مەملەكەتتىك تۋىن كوتەرۋدەن جانە مەملەكەتتىك ءانۇران ورىنداۋدان باستالدى.
- قورىتىندى ەمتيحانداردى تاپسىرۋ كەزىندە سىزدەر جوعارى ءبىلىم مەن وقىتىلاتىن پاندەر بويىنشا جاقسى ناتيجە كورسەتتىڭىزدەر. بۇگىن اسكەري بورىشقا ادال بولۋعا انت بەرىپ، ناعىز وتان قورعاۋشى اتاندىڭىزدار. وسى اتاققا لايىق بولىڭىزدار جانە قازاقستاننىڭ دامۋى مەن وركەندەۋى ءۇشىن ءبارىن جاساڭىزدار، - دەدى حالىق قاھارمانى باقىتجان ەرتايەۆ.
ق. قۇلاجانوۆ اتىنداعى قازاق تەحنولوگيا جانە بيزنەس ۋنيۆەرسيتەتىنىڭ، نازاربايەۆ ۋنيۆەرسيتەتىنىڭ، Maqsut Narikbayev University، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ، قازاق ۇلتتىق پەداگوگيكالىق ۋنيۆەرسيتەتىنىڭ، «تۇران»، «ەسىل» ۋنيۆەرسيتەتتەرىنىڭ، دەنە شىنىقتىرۋ جانە بۇقارالىق سپورت اكادەمياسىنىڭ ستۋدەنتتەرى وتان قورعاۋعا كەز كەلگەن ساتتە دايىن بولۋعا انت بەردى.
جوعارى وقۋ ورىندارى اسكەري كافەدرالارىنىڭ تۇلەكتەرىن قازاق تەحنولوگيا جانە بيزنەس ۋنيۆەرسيتەتىنىڭ پرەزيدەنتى ەرنۇر قۇلاجانوۆ قۇتتىقتادى. اتا-انالار اتىنان راحيلا ۋنىشيەۆا ءسوز سويلەدى.
ءىس-شارا قۇرمەت قاراۋىلى روتاسىنىڭ قاتىسۋىمەن ءوتتى. 68665 اسكەري ءبولىمىنىڭ اسكەري قىزمەتشىلەرى قارۋ-جاراقپەن قويان-قولتىق ۇرىس تاسىلدەرى مەن ساپتىق دەفيلە ەلەمەنتتەرىن كورسەتتى.
انت بەرگەن زاپاستاعى سەرجانتتار الاڭدا سالتاناتتى شەرۋمەن ءجۇرىپ ءوتتى. ءىس-شارا ورتالىق اسكەري وركەستردىڭ مۋزىكانتتارى مەن قارۋلى كۇشتەر ۇلتتىق اسكەري-پاتريوتتىق ورتالىعى ورتالىق ءانسامبلى سوليستەرىنىڭ ونەر كورسەتۋىمەن اياقتالدى.
بۇعان دەيىن اسكەري بولىمدەردە زاماناۋي IT جۇيەلەرمەن بەينەباقىلاۋ ورناتىلاتىنىن جازعان ەدىك.