ەلوردادا «تولاعاي» الىپتار سايىسى وتەدى

استانا. KAZINFORM - مەملەكەتتىك رامىزدەر كۇنىنە وراي 2-ماۋسىمدا ەلورداداعى «استانا ترياتلون» ساياباعىندا «تولاعاي» الىپتار سايىسى وتەدى.

ۇلى دالانىڭ باتىرلارىن ناسيحاتتاپ، قازاقتىڭ ەتنو-ويىندارىن دارىپتەۋ ماقساتىندا وتكىزىلەتىن تۋرنيردە ەلوردالىق سپورتشىلار باق سىناي الادى.

- بىلەكتى باتىرلار سايىستىڭ 5 ءتۇرى بويىنشا، ياعني، 1,5 م ۇزىندىقتاعى تەمىردى مويىنعا سالىپ مايىستىرۋ، سالماعى 100 كەلىلىك تاستى مەجەلى قاشىقتىققا دەيىن اپارۋ، 130 كەلى اۋىر بورەنەنى جەلكەگە سالىپ وتىرىپ- تۇرۋ، 200 كەلىلىك جۇك ارتىلعان اربانى سۇيرەۋ، 10 كەلىلىك نايزانى قاشىقتىققا لاقتىرۋ سياقتى ەرەكشە سايىس تۇرلەرى بويىنشا سىنعا تۇسەدى، - دەپ حابارلادى قالالىق اكىمدىكتىڭ رەسمي سايتى.

ۇيىمداستىرۋشىلاردىڭ ايتۋىنشا، بۇل سايىس قىركۇيەك ايىندا وتەتىن V دۇنيەجۇزىلىك كوشپەندىلەر ويىندارىنا استانا قالاسى بويىنشا ىرىكتەۋ كەزەڭى بولىپ سانالادى. ياعني، بەس سايىستىڭ قورىتىندىسى بويىنشا انىقتالعان ۇزدىكتەر الداعى رەسپۋبليكالىق تۋرنيردە ب ا ق سىنايدى.

جارىستىڭ اشىلۋ سالتاناتى 2-ماۋسىم كۇنى ساعات 16.00 دە، قاتىسۋشىلاردى تىركەۋ جارىس كۇنى ساعات 14.00 گە جوسپارلانعان.

ايتا كەتەيىك، جالپى جۇلدە قورى 1 ميلليون تەڭگەنى قۇرايتىن تۋرنير استانا قالاسى اكىمدىگىنىڭ قولداۋىمەن ەلوردا تورىندە ەكىنشى مارتە وتەدى.