ەلوردادا توعىزقۇمالاقتان «اباي جۇلدەسى» رەسپۋبليكالىق تۋرنيرى ءوتتى

استانا. KAZINFORM - استانادا توعىزقۇمالاقتان «اباي جۇلدەسى» رەسپۋبليكالىق تۋرنيرىنىڭ فينالدىق كەزەڭى ءوتتى. سايىس پارلامەنت سەناتى مەن قازاقستان توعىزقۇمالاق فەدەراتسياسىنىڭ ۇيىتقى بولۋىمەن ۇيىمداستىرىلدى.

جارىستىڭ شەشۋشى سىنىنا وڭىرلىك دەڭگەيدەگى ويىنداردا ۇزدىك شىققان 80 جەڭىمپاز قاتىستى. ولاردىڭ قاتارىندا ءماسليحات دەپۋتاتتارى، ب ا ق وكىلدەرى جانە مەملەكەتتىك مەكەمەلەردىڭ قىزمەتكەرلەرى بار.

ۇيىمداستىرۋشىلاردىڭ ايتۋىنشا، تۋرنيردىڭ باستى ماقساتى - كوشپەلىلەردىڭ كونەدەن كەلە جاتقان زياتكەرلىك ويىنىن دارىپتەۋ. سونداي-اق سايىس قازاقستاندا ءماسليحاتتاردىڭ قۇرىلعانىنا 30 جىل تولۋىنا وراي جانە قىركۇيەك ايىندا ەلوردادا جالاۋى جەلبىرەيتىن V دۇنيەجۇزىلىك كوشپەندىلەر ويىندارىن قولداۋ ماقساتىمەن وتكىزىلگەنىن دە ايتا كەتكەن ابزال.

ءىس-شاراعا ارنايى بارىپ، فينالدىق ويىندارعا قاتىسۋشىلارعا ساتتىلىك تىلەگەن سەنات دەپۋتاتى گەننادي شيپوۆسكيح پالاتا ءتوراعاسى ماۋلەن اشىمبايەۆتىڭ قۇتتىقتاۋ حاتىن وقىپ بەردى.

«مەملەكەت باسشىسى ۇلتتىق قۇرىلتايدىڭ وتىرىسىندا ءتول قۇندىلىقتارىمىزدى دارىپتەۋ جانە تاريحي سانامىزدى جاڭعىرتۋ ماسەلەسىنە باسا ءمان بەردى. بۇل رەتتە تەرەڭنەن تامىر تارتاتىن توعىزقۇمالاق ويىنى ماڭىزدى ءرول اتقارادى. ءماسليحاتتاردىڭ 30 جىلدىعى اياسىندا پارلامەنت سەناتى مەن توعىزقۇمالاق فەدەراتسياسى بىرلەسىپ ۇيىمداستىرعان سايىس الداعى ۋاقىتتا يگى داستۇرگە اينالادى دەپ سەنەمىن. شەشۋشى كەزەڭنىڭ ساناۋلى كۇندەردەن كەيىن باستالاتىن V دۇنيەجۇزىلىك كوشپەندىلەر ويىندارىنىڭ قارساڭىندا وتكىزىلۋىنىڭ دە سيمۆوليكالىق ءمانى زور»، - دەلىنگەن جەدەلحاتتا.

بۇعان دەيىن ءبىر جارىم اي بويى ەلىمىزدىڭ 20 وڭىرىندە، ونىڭ ىشىندە شالعاي ەلدىمەكەندەردە دە ىرىكتەۋ تۋرنيرلەرى وتكىزىلگەن ەدى. وبلىستارداعى ويىنشىلاردىڭ دەڭگەيىن ارتتىرۋ ماقساتىمەن شەبەرلىك ساباقتارى دا ۇيىمداستىرىلدى.

تارتىستى وتكەن سايىستىڭ ناتيجەسىندە باتىس قازاقستان وبلىسىنان كەلگەن قاتىسۋشىلار (دۋمان شانوۆ، ءادىلحان ناۋرىزباي، اياجان ءبىرجان قىزى جانە ساياجان ءبىرجان قىزى) جەڭىمپاز اتاندى. ەكىنشى ورىن قىزىلوردا قالاسىنىڭ كومانداسىنا (بەرىك التىنبەك ۇلى، جاندوس دوسجان، ديدار سارسەن جانە رايكۇل ەشمۇراتوۆا) بۇيىردى. ال، ۇزدىك ۇشتىكتى پاۆلودار قالاسىنىڭ ويىنشىلارى (ارىستانبەك جانبەك، جانىبەك جۇمابايەۆ، مەيىر نۇرجان جانە لاريسا رۋبليەۆا) تۇيىندەدى.