ەلوردادا تاعى ءبىر اۋىل شارۋاشىلىعى جارمەڭكەسى اشىلادى

 استانا. قازاقپارات - 29-ماۋسىمنان باستاپ استانادا بەيبارىس سۇلتان كوشەسىنىڭ بويىندا جاڭا اۋىل شارۋاشىلىعى جارمەڭكەسى باستالادى.

استانا اكىمدىگى رەسمي سايتىنىڭ مالىمەتىنشە، جاڭا جارمەڭكە «ريو- دە- جانەيرو» ت ك قاراما- قارسى ورنالاسادى (بەيبارىس سۇلتان كوشەسى، 23). ول كۇن سايىن ساعات 9.00 دەن 20.00 گە دەيىن كەلۋشىلەر ءۇشىن اشىق بولادى.

جارمەڭكەدە جەرگىلىكتى، سونداي- اق تۇركىستان، جامبىل جانە اقمولا وبلىستارىنىڭ تاۋار وندىرۋشىلەرىنىڭ ءتۇرلى تاۋارلارى ۇسىنىلادى.

كەلۋشىلەر جاڭا پىسكەن كوكونىستەر مەن جەمىستەردى، ساپالى ەت، ۇن ونىمدەرىن جانە باسقا دا كوپتەگەن اۋىلشارۋاشىلىق ءونىمىن ساتىپ الا الادى.

كەلۋشىلەرگە ىڭعايلى بولۋ ءۇشىن جارمەڭكەنىڭ جانىندا № 49،73 اۆتوبۋس مارشرۋتتارى وتەدى. بۇل ءىس- شارا وتەتىن جەرگە ىڭعايلى قولجەتىمدىلىكتى قامتاماسىز ەتەدى.

ايتا كەتۋ كەرەك، ەلوردادا دەمالىس كۇندەرى جارمەڭكە جۇمىس ىستەيدى. ول سارىارقا اۋدانىندا ب. سوقپاقبايەۆ كوشەسى، 21-مەكەنجايىندا ورنالاسقان. بۇل جارمەڭكە ءار دەمالىس كۇندەرى ساعات 10:00 دەن 19:00 گە دەيىن جۇمىس ىستەيدى.