ەلوردادا رەسپۋبليكالىق سۋرەتشىلەر بايقاۋى ءوتتى

استانا. KAZINFIRM - ەلوردادا مادەنيەت جانە اقپارات مينيسترلىگىنىڭ ۇيىمداستىرۋىمەن «ۇلتتىق قۇندىلىقتار: سالتتىڭ سىرلى بەينەسى» اتتى رەسپۋبليكالىق شىعارماشىلىق بايقاۋىنىڭ جەڭىمپازدارى ماراپاتتالدى، دەپ حابارلايدى 24KZ.

قىلقالام شەبەرلەرىنىڭ دوداسىنا وڭىرلەردەن كەلگەن 137 كاسىبي سۋرەتشى قاتىستى. ولار قازاقتىڭ مادەني قۇندىلىقتارىن بەينەلەپ، ءوز ەڭبەكتەرىن پەيزاج، ناتيۋرمورت جانە سيۋجەتتى كارتينا جانرلارىندا ۇسىندى. بايقاۋ قورىتىندىسى بويىنشا قازاقتىڭ سالت-ءداستۇرى مەن ادەت-عۇرپىنا ەرەكشە كوركەمدىك كوزقاراس بەرگەن ۇزدىك جۇمىستار تاڭدالدى. گران- پري «ءومىر ەسىگى» كارتيناسىن ۇسىنعان الماتىلىق ورالبەك قابوكەگە بۇيىردى. تاعى قامي ايتقاليەۆ، ءۇمىت جۇبانىشيەۆا جانە اسەت جاقىپبەك ۇزدىك ۇشتىككە كىردى.

ورالبەك قابوكە، «ۇلتتىق قۇندىلىقتار: سالتتىڭ سىرلى بەينەسى» رەسپۋبليكالىق بايقاۋىنىڭ گران-پري يەگەرى:

- «ءومىر ەسىگى» دەپ اتالۋىنا ساي بۇل جەردەگى كومپوزيتسيالىق قۇرىلىمى، ەسىكتىڭ اركانىڭ فورماسىندا قۇرالعان جانە دە وسى «زولوتوە سەچەنيە» دەيمىز عوي، التىن بەلگىدە وسى ومىرگە كەلىپ جاتقان جاس ءسابيدى بەسىككە بولەۋ ءساتى بەينەلەنگەن شىعارمادا.