ەلوردادا كونەرگەن تەمىرجول اۋرۋحاناسىنىڭ ورنىنا جاڭاسى سالىنادى

استانا. KAZINFORM - استانا قالاسى اكىمىنىڭ ورىنباسارى ەۆگەني گلوتوۆ قوعامدىق كەڭەستىڭ وتىرىسىندا 1959 -جىلى سالىنعان تەمىرجول اۋرۋحاناسىنىڭ پروبلەماسى قالاي شەشىلەتىنىن ايتتى.

«شىنىمەن دە تەمىرجول اۋرۋحاناسىنىڭ عيماراتى 1959 -جىلى سالىنعان. تەحنيكالىق جاعدايىنا بايلانىستى پروبلەما وتە كوپ. سوندىقتان بيىل ءىشىنارا جوندەۋ جۇرگىزىپ جاتىرمىز. ءبىراق پروبلەمانى تۇبەگەيلى شەشۋ كەرەك. بۇعان دەيىن جاريا تۇردە ايتپاعان ەدىك. ءبىراق ايتا باستاۋىمىز كەرەك شىعار. مەملەكەت باسشىسى ءبىز ۇسىنعان شەشىمدى ماقۇلدادى. قارجىلاندىرۋ كوزى دە بەلگىلەندى. كەلەسى جىلى جاڭا كوپسالالى اۋرۋحانانىڭ قۇرىلىسى باستالادى»، - دەدى ول.

شەنەۋنىك سوزىنشە، ول نىسان سارى ارقا اۋدانىنىڭ «كوكتال» ساياباعى جاعىندا ورىن تەبەدى.

«سامۇرىق- قازىنا» سالىپ جاتقان پەريناتالدى ورتالىقتىڭ جانىنان سالىنادى. سوندا ول اۋماقتا تولىققاندى مەديتسينالىق كلاستەر پايدا بولادى. ياعني، 2,5 جىلدىڭ ىشىندە سونداي كەشەن پايدا بولادى. ەڭ باستىسى، پرەزيدەنتتىڭ بىزگە، ۇكىمەت پەن «سامۇرىق- قازىناعا» بەرگەن رەسمي تاپسىرماسى بار. بيىل جوبالاۋ- سمەتالىق قۇجاتتارىن اياقتاپ، مەملەكەتتىك ساراپتامادان ءوتىپ ۇلگەرۋىمىز كەرەك»، - دەدى اكىمدىك وكىلى.

اۆتور

ەسىمجان ناقتىباي