ەلوردادا كەنەسارى جايلى تاريحي روماننىڭ تۇساۋى كەسىلدى
استانا. KAZINFORM - ەلوردادا Astana Eurasian Book Fair 2024 حالىقارالىق كىتاپ كورمە-جارمەڭكەسىندە جازۋشى، حالىقارالىق «الاش» ادەبي سىيلىعىنىڭ يەگەرى ادىلبەك ىبىرايىم ۇلىنىڭ «سەمسەر جۇزىندەگى سەرت» تاريحي رومان- تريلوگياسىنىڭ تانىستىرىلىمى ءوتتى.
بۇل ءۇش تومدىق «ارلاننىڭ ازۋى»، «سەرت» جانە «رۋح» دەپ اتالاتىن كولەمدى ءۇش كىتاپتان تۇرادى.
تاريحي تۋىندى قازاقتىڭ سوڭعى حانى كەنەسارى قاسىم ۇلىنىڭ ءومىرى مەن ەرلىك ىستەرى تۋرالى سىر شەرتەدى.
جاڭا شىعارما «فوليانت» باسپاسىنان جارىق كورگەن.
وسى شارانىڭ ۇيىمداستىرۋشىسى دا اتالعان باسپا بولىپ وتىر.
رۋحاني ءىس-شارانى مودەراتورى، اقىن، قازاقستان جازۋشىلار وداعى استانا قالاسى فيليالىنىڭ ديرەكتورى داۋلەتكەرەي كاپ ۇلى جۇرگىزدى.
كىرىسپە سوزىندە د. كاپ ۇلى:
«جالپى، كىتاپ دەگەن توزبايتىن اقىلدىڭ كەنى. «جاقسى ات اربا-شاناعا بىردەي جۇرەدى» دەگەندەي، ادىلبەك ىبىرايىم ۇلى ءارى اقىن، ءارى جازۋشى. ءبىر وزىندە بىرنەشە ونەر كەنى بار دارىندى قالامگەر. كەنەسارىعا ارنالعان كىتاپتىڭ اتاۋى دا كوپ جايتتان حابار بەرىپ تۇر»، - دەدى.
وقىرمانعا جول تارتقالى وتىرعان ءۇش تومدىق ەڭبەك تۋرالى قالامگەرلەر قۋانىش جيەنباي، جانبولات اۋپباي، تورتاي ءسادۋاقاسوۆتار پىكىر ءبىلدىردى.
سەنات دەپۋتاتتارى نۇرتورە ءجۇسىپ، عالياسقار سارىبايەۆ پەن امانگەلدى تولاميسوۆ جانە ءماجىلىس دەپۋتاتى بولات كەرىمبەك قوعامدا كىتاپ وقۋدىڭ ماڭىزىن كۇشەيتۋ تۋرالى ويلارىن ورتاعا سالدى.
سەناتور نۇرتورە ءجۇسىپ:
«بالانىڭ رۋحىن تازالىققا تاربيەلەۋدىڭ ماڭىزى زور. ءتىلى شىققان سوڭ تاقپاق جاتتاعان، ەسەيە كەلە ولەڭگە قۇمارتقان بالادان ىزگى نيەتتى ازامات قالىپتاساتىنى انىق. ءبىز جاس ۇرپاقتى ادەبيەت، ونەر، مادەنيەت ارقىلى تاربيەلەۋىمىز كەرەك. بۇل ماسەلەنى ۇلتتىق قۇرىلتاي جيىنىندا قازاقستان پرەزيدەنتى قاسىم-جومارت توقايەۆ تا ايتتى»، - دەدى.
الاش تانۋشى عالىم قايرات ساق كىتاپ اۆتورىمەن قازاق مەملەكەتتىك ۋنيۆەرسيتەتىندە بىرگە وقىعانىن ايتا كەلىپ، ادىلبەك ىبىرايىم ۇلىنىڭ بۇگىنگى تاڭدا ادەبيەت الەمىندەگى قول جەتكىزگەن تابىسىن زامانداستارى جوعارى باعالايتىنىن جەتكىزدى.
ءوز سوزىندە ادىلبەك ىبىرايىم ۇلى بۇل تۋىندىسىنا ءبىرقاتار وزگەرىستەر ەنگىزىپ، «فوليانت» باسپاسىنان قايتا شىعارىپ وتىرعانىن مالىمدەدى.
اۆتور كەنەسارى حاننىڭ ومىرىندەگى قيلى كەزەڭدەر، ۇلت-ازاتتىق كوتەرىلىسىن باستاپ شىققان كەزدە جۇرگىزگەن سوعىسۋدىڭ امال-تاسىلدەرى جونىندە اڭگىمەلەپ بەردى.
جينالعان قاۋىمعا جانە «فوليانت» باسپاسى مەن وسى شارانى ۇيىمداستىرۋشىلارعا ريزاشىلىعىن ءبىلدىردى.
اۆتور
عايساعالي سەيتاق