ەلوردادا ديسنەيلەند سالىنادى
استانا. KAZINFORM - ەلوردادا «جىبەك جولى» دەگەن اتاۋمەن ديسنەيلەند سالىنادى. بۇل تۋرالى «Astana Invest» باسقارما ءتوراعاسىنىڭ ورىنباسارى ورىنبەك قۋانىشپەن «ULKENBAY» كومپانياسىنىڭ وكىلدەرىمەن كەزدەسۋىندە بەلگىلى بولدى.
Instagram-داعى architecture_astana پاراقشاسىندا جاريالانعان اقپاراتقا قاراعاندا، شاڭحايداعى ديسنەيلەندكە بالاما اتتراكتسيوندار پاركى قازاقستان مەن قىتايدىڭ مادەني ەرەكشەلىكتەرىن ۇشتاستىراتىن بولادى.
«ينۆەستورلار جوبانىڭ جوعارى ساپاسى مەن بىرەگەيلىگىن قامتاماسىز ەتۋ ءۇشىن شاڭحاي قالاسىنداعى ديسنەيلەندتى جاساعان جوبالاۋشىلاردى تارتۋعا نيەتتى ەكەندىگىن حابارلادى. اتالعان ساياباقتىڭ نەگىزگى يدەياسى - بالالاردىڭ تەك كوڭىل كوتەرىپ قانا قويماي، ويىن ارقىلى ەكى ەلدىڭ مادەنيەتىنىڭ باي ەكەندىگىن جانە الۋان تۇرلىلىگىن ۇيرەنۋى جانە سەزىنۋى»، - دەلىنگەن تاراتىلعان اقپاراتتا.
كەزدەسۋ بارىسىندا تاراپتار جوبانى جۇزەگە اسىرۋعا بايلانىستى قۇرىلىس مەرزىمى، قارجىلاندىرۋ كوزدەرى، جەرگىلىكتى بيلىكپەن ىنتىماقتاستىق كەلەشەگى سىندى نەگىزگى ماسەلەلەردى تالقىعا سالدى.
وسى ورايدا ورىنبەك قۋانىش ءوڭىر ءۇشىن اسا ماڭىزدى جوبانى ءساتتى جۇزەگە اسىرۋ ءۇشىن جۇمىلدىرىلۋى مۇمكىن مەملەكەتتىك قولداۋ تەتىكتەرىنە باسا نازار اۋدارتتى.