بۇل تۋرالى ەلوردا اكىمدىگىنىڭ رەسمي سايتى حابارلادى.
ۇلتتىق سپورتتى دامىتۋ ارقىلى سالاماتتى ءومىر سالتىن ناسيحاتتاۋ جانە كوكپاردان ۇزدىك سپورتشىلاردى انىقتاۋ ماقساتىندا وتەتىن تۋرنيرگە بۇگىنگە دەيىن 7 كوماندا تىركەلدى.
«كوكپارعا قاراعاندىدان 2 كوماندا، استانا مەن اقمولا، پاۆلودار، قوستاناي جانە سولتۇستىك قازاقستان وبلىستارىنان ءبىر كوماندادان تىركەلدى. تىركەلۋ ءالى دە جالعاسىپ جاتىر. تۋرنير باعدارلاماسىنا سايكەس، 10-قازان كۇنى جارىستىڭ العاشقى كۇنى كوكپارشىلار، شاباندوزدار، اتبەگىلەر كەلىپ ورنالاسىپ، ماندات كوميسسياسى مەن تورەشىلەر القاسىنىڭ وتىرىسى، جەرەبە تارتۋ، جارىس اتتارىن الاڭمەن تانىستىرۋ ءىس-شارالارى وتەدى. جالپى 11 قازاندا كوكپاردان توپتىق ويىندار باستالادى. ال، 12-قازان كۇنى كوكپاردان فينالدىق ويىندار ۇيىمداستىرىلادى. مۇندا جۇلدەلى التى ورىن بولادى. كوكپار تۋرنيرىنىڭ جالپى جۇلدە قورى - 12000000 ميلليون تەڭگەنى قۇرايدى»، - دەدى جارىستىڭ باس تورەشىسى ەرلان كاناپين.
سونداي-اق فەستيۆال اياسىندا بايگە تۇرلەرىنەن سايىستار وتەدى. ياعني بايگەنىڭ قۇنان بايگە، جورعا جارىس، توپ بايگە، الامان بايگە ۇيىمداستىرىلادى.
«جالپى بايگە بويىنشا بۇگىندە ونلاين تۇردە 8 ات تىركەلدى. ونىڭ ىشىندە «الامان» بايگەگە - 5 ات، قۇنانعا - 3 ات. بايگە جارىستارىنىڭ جالپى جۇلدە قورى - 20000000 ميللليون تەڭگە. سونىڭ ىشىندە «الامان» بايگە عانا 5-ورىنعا دەيىن جەڭىمپازداردى انىقتايدى. قالعان بايگە تۇرلەرى 3 ورىن عانا»، - دەدى استانا قالاسى بويىنشا «بايگە» فەدەراتسياسىنىڭ تورەشىسى گۋلنارا بازارحانوۆا.
ايتا كەتەيىك كوپشىلىك كوز تىككەن جۇيرىكتەر دوداسىنىڭ اشىلۋ سالتاناتى 12-قازان كۇنى ساعات 11.00 دە وتەدى. كورەرمەندەر ءۇشىن ۇلتتىق ات سپورتى فەستيۆالىنە كىرۋ تەگىن. سونداي-اق «قازانات» اتشابارىنا 303، 309 جانە 323 اۆتوبۋستار قاتىنايدى.