ەلوردادا اقىلى تۇراق اقىسى وسە مە

استانا. KAZINFORM - ەلوردادا الداعى ۋاقىتتا اقىلى تۇراق اقىسىن ءوسىرۋ جوسپاردا جوق. بۇل تۋرالى قالالىق كولىك جانە جول- كولىك ينفراقۇرىلىمىن دامىتۋ باسقارماسىنىڭ باسپا ءسوز قىزمەتى حابارلادى.

«استانا قالاسى اكىمدىگىنىڭ 2016 -جىلعى 3-مامىرداعى №108-863 قاۋلىسىمەن بەكىتىلگەن استانا قالاسىنىڭ اۋماعىندا اۆتوتۇراقتاردى ۇيىمداستىرۋ قاعيدالارىنىڭ 3-تاراۋىنا سايكەس، اقىلى تۇراق قىزمەتتەرىنە ەسەپ ايىرىسۋ ءتارتىبى ايقىندالعان. استانا قالاسى اكىمدىگىنىڭ 2016 -جىلعى 22-جەلتوقسانداعى №108-2602 «استانادا كولىك قۇرالدارىن ورىنتۇراققا قويعانى ءۇشىن اقى الۋعا جانە ولاردىڭ ورىنتۇراقتا تۇرعان ۋاقىتىن ەسەپتەۋگە ارنالعان سەرتيفيكاتتالعان ارنايى قۇرىلعىلارمەن جابدىقتالعان ورىنداردا ءتاريفتى بەلگىلەۋ تۋرالى» قاۋلىسىنا سايكەس كولىكتىڭ 1 ساعات تۇرعانى ءۇشىن 100 (ءجۇز) تەڭگە مولشەرىندە تاريف ايقىندالدى. قازىرگى ۋاقىتتا ءتاريفتىڭ وزگەرۋى قاراستىرىلمايدى»، - دەلىنگەن باسقارمانىڭ Kazinform اگەنتتىگىنىڭ ساۋالىنا جولداعان جاۋابىندا.

سونداي-اق باسقارما ماماندارى بارلىق اقىلى تۇراقتار زاڭدى نەگىزدە، ياعني استانا قالاسى اكىمدىگىنىڭ 2024 -جىلعى 31-مامىرداعى №503-1959 «استانا قالاسىندا كولىك قۇرالدارىن ورىنتۇراققا قويعانى ءۇشىن اقى الۋعا جانە ولاردىڭ ورىنتۇراقتا تۇرعان ۋاقىتىن ەسەپتەۋگە ارنالعان سەرتيفيكاتتالعان ارنايى قۇرىلعىلارمەن جابدىقتالعان ورىنداردى ايقىنداۋ» بەكىتىلگەن قاۋلىسىنا سايكەس بەلگىلەنگەنىن اتاپ ءوتتى.

بۇعان دەيىن ەلوردادا بيىل اقىلى تۇراق اقىسىن تولەمەگەن جۇرگىزۋشىلەرگە 2 ميلليارد تەڭگە ايىپپۇل سالىنعانىن جازعان ەدىك.

ال، «استانا تۇراق كەڭىستىگى» اقىلى تۇراقتاردان ءبىر جىلدا 800 ميلليون تەڭگە تابىس تاپقان.