ەلوردادا 26-ءساۋىر كۇنى جالپىقالالىق سەنبىلىك وتەدى

استانا. KAZINFORM - ەلوردادا «تازا قازاقستان. استانا - تازالىق پەن ءتارتىپتىڭ ۇلگىسى» ەكولوگيالىق اكسياسى اياسىندا وسى دەمالىس كۇندەرى، 26-ساۋىردە جالپىقالالىق سەنبىلىك وتەدى، دەپ حابارلايدى قالا اكىمدىگىنىڭ رەسمي سايتى.

سەنبىلىك اياسىندا قالا اۋماعىن قوقىستان تازارتۋ، ساياباقتاردى، گۇلزارلاردى، اۋلالاردى، سونداي-اق ساۋدا، قوعامدىق تاماقتانۋ نىساندارىنا جانە باسقا دا ۇيىمدارعا ىرگەلەس اۋماقتاردى جيناۋ جوسپارلانىپ وتىر.

اكىمدىك قالانىڭ بارلىق كاسىپورنىن، م ي ب (پ ي ك)، شاعىن جانە ورتا بيزنەس سۋبەكتىلەرىن، ەرىكتىلەر مەن بەلسەندى قالا تۇرعىندارىن ەكواكسياعا قوسىلۋعا جانە تازالىق شاراسىنا قاتىسۋعا شاقىرادى.

اۋقىمدى ەكواكسيا اياسىندا 1,4 مىڭنان استام جاسىل جەلەك وتىرعىزۋ جوسپارلانعان.

ەستەرىڭىزگە سالا كەتەيىك، ەكواكسيانىڭ نەگىزگى ماقساتى قالا كوشەلەرىندەگى تازالىقتى ساقتاۋ جانە ەكولوگيالىق مادەنيەتتى قالىپتاستىرۋ ماسەلەلەرىنە جۇرتشىلىقتىڭ نازارىن اۋدارۋ بولىپ سانالادى.

قالانىڭ بارلىق تۇرعىنى مەن ۇيىمدارى كوشەلەر مەن اۋلالاردى اباتتاندىرۋعا ۇلەس قوسا الادى. ەكواكسيا ساعات 10.00 دەن باستالادى.

ەسكە سالا كەتەيىك، بۇعان دەيىن استانادا مەرەكە قارساڭىندا قالالىق اۋىل شارۋاشىلىعى جارمەڭكەسى وتەتىنىن جازعان ەدىك.